खासगी डॉक्टरांच्या सुरक्षेसाठी पुढील अधिवेशनात कायदा

कोलकाता येथे महिला डॉक्टरवर झालेल्या बलात्कार प्रकरणात देशभर डॉक्टरांमध्ये संतापाचे वातावरण पसरले आहे. राज्यातही निषेध म्हणून डॉक्टरांनी आंदोलन केले. या पार्श्वभूमीवर आरोग्यमंत्री राणे म्हणाले, ‘कोलकातामधील घटना निंदनीय आहे. डॉक्टरांच्या भावनांशी आम्ही सहमत आहोत. आरोग्यमंत्री म्हणून डॉक्टरांना माझा पाठिंबा आहे. केवळ सरकारीच नव्हे, तर गोव्यातील खासगी इस्पितळांचे डॉक्टर्स, परिचारिका व इतर कर्मचाऱ्यांच्या सुरक्षेसाठी लवकरच एकतर वटहुकूम आणला जाईल किंवा विधानसभेच्या पुढील अधिवेशनात विधेयक आणून कायदा केला जाईल.’ राणे म्हणाले , ‘डॉक्टर म्हणजे देव असे आम्ही मानतो. त्यांना संरक्षण देणे आमचे कर्तव्य आहे. राज्यातील महिला डॉक्टर तसेच कर्मचाऱ्यांना आवश्यक ती सर्व सुरक्षा देऊ. इस्पितळांमध्ये सीसीटीव्ही कॅमेरे बसवण्याची मागणी डॉक्टरांनी केली आहे, तीही पूर्ण केली जाईल.’ विश्वजित राणे म्हणाले की,’कोलकातामध्ये घडलेली घटना भयावह आहे. ममता बॅनर्जी यांनी निदान महिला मुख्यमंत्री म्हणून तरी या घटनेप्रती संवेदनशीलता दाखवायला हवी होती; परंतु दुर्दैवाने या घटनेचे राजकारण केले जात आहे.’

दरम्यान, राणे यांनी पश्चिम बंगालमध्ये एका निरपराध महिला डॉक्टरवरील बलात्काराचा तीव्र निषेध केला आहे. ते म्हणाले,’ बलात्कार व त्यानंतर तिचा झालेला संशयास्पद मृत्यू या घृणास्पद गुन्ह्याचा मी तीव्र निषेध करतो. पीडित कटूंबाप्रती माझ्या संवेदना आहेत. ही शोकांतिका डॉक्टर्स तसेच आरोग्य कर्मचाऱ्यांसाठी सुरक्षा उपायांची तातडीची गरज अधोरेखित करते. ही घटना आपल्या आरोग्यसेवा कर्मचाऱ्यांना दररोज येणाऱ्या आव्हानांची आठवण करून देते. डॉक्टर इतरांना वाचवण्यासाठी आपले जीवन समर्पित करतात त्यांची सुरक्षा आणि सन्मान सुनिश्चित करण्यासाठी आपण संघटित झाले पाहिजे.’