गोवा खबर
गोवा आणि महाराष्ट्र भाजपचे म्हादईप्रश्नी नवे नाटक, लोकांची दिशाभूल करत असल्याचा चोडणकरांचा आरोप
गोवा खबर: म्हादईप्रश्नी गोवा आणि महाराष्ट्राच्या मुख्यमंत्र्यांच्या कर्नाटक विरोधात एकत्र लढण्याच्या वक्तव्यावर काँग्रेस नेते गिरीश चोडणकर यांनी टिका करताना कर्नाटकात काँग्रेस सरकार सत्तेवर आल्याने लोकांची दिशाभूल करण्यासाठी हे नाटक रचले आहे असे म्हटले आहे.
महाराष्ट्राचे मुख्यमंत्री एकनाथ शिंदे यांनी नुकतेच गोव्याचे मुख्यमंत्री प्रमोद सावंत यांच्या उपस्थितीत म्हादईच्या मुद्द्यावर महाराष्ट्र आणि गोवा एकत्र येऊन कर्नाटकविरुद्ध लढणार असल्याचे सांगितले.
गोवा आणि महाराष्ट्र हे भाऊ असून आमच्यात कोणतेही वाद नाहीत. आम्ही कर्नाटकविरुद्ध एकत्र लढणार आहोत,असे शिंदे म्हणाले.
‘आपण दोघे एकत्र राहिलो तर त्याचा गोव्याला मोठा फायदा होईल,’ असे म्हणत सावंत यांनी या विधानाचे स्वागत केले होते.
या वक्तव्यावरून प्रमोद सावंत यांच्यावर टिका करत चोडणकर म्हणाले की, या कृत्यामुळे भाजपच्या ट्रिपल इंजिन सरकारचा आता पर्दाफाश झाला आहे.
‘‘केंद्र, कर्नाटक, महाराष्ट्र आणि गोव्यात भाजपचे सरकार असताना प्रमोद सावंत आणि एकनाथ शिंदे यांना कर्नाटकविरोधात अशी विधाने करण्यास आणि कृती करण्यास कोणी रोखले होते? कर्नाटकात भाजपचा दारुण पराभव झाल्यानंतर दोघेही केंद्राच्या तालावर नाचत आहेत आणि राजकीय लाभ मिळवण्यासाठी विधाने करत आहेत, हे आता स्पष्ट झाले आहे,’ असे चोडणकर म्हणाले.
ते म्हणाले, “आता कर्नाटकात काँग्रेसची सत्ता असल्याने गोवा आणि महाराष्ट्राच्या दोन्ही मुख्यमंत्र्यांनी म्हादईच्या मुद्द्यावर हातमिळवणी केली आहे हे अगदी स्पष्ट आहे.”
गोव्याचे मुख्यमंत्री प्रमोद सावंत यांना गोव्याच्या पाणीटंचाईची खरोखरच काळजी असेल, तर त्यांनी एकनाथ शिंदे यांना विर्डी धरणाचे बांधकाम करू नये, असा इशारा द्यावा,’’ असे ते म्हणाले.
एप्रिलच्या सुरुवातीला, गोवा-महाराष्ट्र सीमेवर असलेल्या विर्डी येथील कट्टिका उपनदीमार्गे वाळवंटी नदीवर धरण बांधण्यासाठी महाराष्ट्र सरकारने विर्डी धरणाचे काम सुरू करण्यासाठी आपली यंत्रणा चालीस लावली होती.
“मुख्यमंत्री प्रमोद सावंत यांना हिंमत असेल तर त्यांनी केंद्रातील त्यांच्या नेत्यांशी बोलून महाराष्ट्राला पाणी वळवण्यापासून रोखले पाहिजे,’’ असे चोडणकर म्हणाले.
चोडणकर म्हणाले की, प्रमोद सावंत यांनी म्हादईप्रश्नावर गोव्यातील जनतेला नेहमीच फसवले असून, म्हादईचे पाणी कर्नाटकला मिळणार असल्याचे वक्तव्य करणाऱ्या केंद्रीय गृहमंत्री अमित शहा यांच्याबाबत त्यांनी मौन बाळगले आहे.
प्रमोद सावंत यांना विश्वासात घेऊन म्हादईचे पाणी देण्याचा निर्णय घेतल्याचे अमित शहा यांनी स्पष्टपणे सांगितले होते. जर त्यांनी होकार दिला नसेल तर ते त्यांचा दावा का फेटाळत नाहीत, असा सवाल चोडणकर यांनी केला.
