गोवा खबर
आमदार प्रशिक्षण शिबिरावर आपचा बहिष्कार;नाराजी व्यक्त करत करत काँग्रेसने लावली हजेरी
गोवा खबर:आमदाराचे खरे काम कायदे बनविणे आणि चांगले कायदे करणे हे असते त्यामुळे त्यांनी विधानसभेत अवलंबिलेल्या कार्यपद्धतींचा अभ्यास करणे गरजेचे आहे असे प्रतिपादन हिमाचल प्रदेशचे राज्यपाल व गोवा विधानसभेचे माजी सभापती श्री राजेंद्र आर्लेकर यांनी केले. गोवा विधानमंडळ सचिवालय आणि रामभाऊ म्हाळगी प्रबोधिनी यांच्या संयुक्त विद्यमाने राजधानीत गोव्यातील आमदारांसाठी आयोजित केलेल्या दोन दिवसीय प्रशिक्षण कार्यक्रमाच्या उद्घाटन कार्यक्रमात श्री राजेंद्र आर्लेकर प्रमुख पाहुणे म्हणून बोलत होते.
गोवा विधीमंडळ सचिवालयाने हे शिबिर विधानसभेत सर्व सोई उपलब्ध असून देखील पैशांची उधळपट्टी करत पंचतारांकीत हॉटेल मध्ये घेतल्या बद्दल नाराजी व्यक्त करत काँग्रेसच्या आमदारांनी शिबिराला हजेरी लावली.मात्र आम आदमी पक्षाच्या दोन्ही आमदारांनी भाजपाची प्रचारक संस्था असलेल्या रामभाऊ म्हाळगी प्रतिष्ठानला प्रशिक्षणासाठी निमंत्रित केल्या बद्दल नाराजी व्यक्त करत शिबिरावर बहिष्कार टाकला.
यावेळी बोलताना, आर्लेकर यांनी एखादा आमदार जेव्हा सभागृहात असतो तेव्हा सर्वांचे लक्ष त्याच्या विधानसभेतील कामगिरीकडे असे सांगितले. आमदारांना सभागृहाची कार्यपद्धती याविषयी प्रशिक्षण देण्याची गरज असल्याचे सांगून श्री आर्लेकर म्हणाले की जेव्हा आम्ही उमेदवारांना कोणत्याही कामासाठी नियुक्त करतो तेव्हा त्यांच्याकडे त्यांचा अनुभव आणि पात्रता विचारतो, मात्र आमदाराकडे आवश्यक प्रशिक्षण आहे का असे कोणीही विचारत नाही असे त्यांनी सांगितले. आमदारांनाही प्रशिक्षणाची गरज आहे असे त्यांनी नमूद केले.
विधानसभा हे लोकशाहीचे मंदिर असेल तर आपण त्याप्रमाणे वागले पाहिजे असे सांगून राज्यपाल म्हणाले की आमदारांनी विधानसभेचा वेळ वाया घालवू नये, चर्चेच्या विषयाची स्वत:ला चांगली ओळख करून घ्यावी आणि सर्वांना सभागृहात बोलण्याची संधी मिळावी असे ते म्हणाले.
मुख्यमंत्री डॉ. प्रमोद सावंत यांनी अशा प्रशिक्षण कार्यक्रमाचे आयोजन केल्याबद्दल सभापती आणि गोवा विधानसभेचे अभिनंदन करताना सांगितले की केवळ काही लोकच सभागृहाच्या कामकाजाचे नियम आणि कार्यपद्धती वाचतात. डॉ. सावंत म्हणाले की एखाद्या आमदाराला यशस्वी व्हायचे असेल तर हे कार्यपद्धतीचे पुस्तक पवित्र ग्रंथासारखे आहे कारण आमदारांचा स्वभाव तो सभागृहात कसा वागतो यावरच ठरतो.
ते पुढे म्हणाले की हे प्रशिक्षण केवळ सत्ताधारीच नाही तर विरोधकांच्या फायद्यासाठी आहे सत्ताधारी चुका करतात तेव्हा दुरुस्त करण्यासाठी नंतरची उपस्थिती ज्याची खूप आवश्यकता आहे. सभागृहाची कार्यपद्धती आणि सभागृहाची साधने कशी वापरायची हे जाणून घेणे लोकशाहीसाठी चांगले आहे असे ते म्हणाले.
विधानसभेच्या स्थापन केलेल्या समित्यांच्या अस्तित्वाचे महत्त्वही मुख्यमंत्र्यांनी प्रतिपादले. त्या विधायक कामाचे माध्यम बनू शकतात असे ते म्हणाले. विधानमंडळ आणि विभागीय अभ्यासासाठी इतर राज्यांच्या विधानसभांमध्ये अभ्यास दौरे करण्याची गरजही त्यांनी व्यक्त केली.
गोवा विधानसभेचे सभापती रमेश तवडकर म्हणाले की यावेळी राज्य विधानसभेत सुमारे १९ नवीन आमदार आले आहेत हे लक्षात घेऊन हा प्रशिक्षण कार्यक्रम आयोजित करण्यात आला. समाजासाठी विविध क्षेत्रात दिलेल्या योगदानामुळे अनेक आमदार निवडून येतात मात्र असे क्षेत्रिय कार्य करणे आणि विधानसभेत काम करणे या दोन वेगळ्या गोष्टी असल्याचे ते म्हणाले. ते म्हणाले की एकदा एखादी व्यक्ती निवडून आली की लोकांच्या आमदाराकडून खूप अपेक्षा असतात आणि या लोकांना सेवा देण्यासाठी आमदारांनी सभागृहाच्या कामकाजाची ओळख करून घेणे महत्त्वाचे आहे.
असे प्रशिक्षण कार्यक्रम महत्त्वाचे असल्याचे सांगून विरोधी पक्षनेते मायकल लोबो म्हणाले की आमदारांनी सभागृहात विधायक प्रश्न विचारले तर विधानसभेतच प्रश्न सुटू शकतात.
यावेळी विधीमंडळ मंत्री श्री नीलेश काब्राल, विधीमंडळ सचिव, श्रीमती. नम्रता उलमान, रामभाऊ म्हाळगी प्रबोधिनीचे महासंचालक श्री रवींद्र साठे व आमदार उपस्थित होते.
