109 स्मृतिचिन्हांच्या लिलावातून पश्चिम बंगालचा विविधांगी सांस्कृतिक आणि कलात्मक वारसा अधोरेखित

गोवा खबर:पंतप्रधान स्मृतिचिन्हांच्या 8व्या ई-लिलाव 2026 मध्ये पश्चिम बंगालचे विशेष स्थान आहे. राज्याच्या विविध कलात्मक, सांस्कृतिक, धार्मिक आणि वारसा परंपरांचे प्रतिनिधित्व करणारी 109 स्मृतिचिन्हे या ई-लिलावात समाविष्ट आहेत. या संग्रहात पारंपरिक हस्तकला, भक्तीपर कलाकृती, वारसा स्थळांची प्रतिकृती, लोककला प्रकार तसेच प्रसिद्ध व्यक्तिमत्त्वांशी संबंधित स्मृतिचिन्हांचा समावेश आहे.

पंतप्रधान स्मृतिचिन्हांच्या 8व्या ई-लिलावाची प्रक्रिया 2 ऑक्टोबर 2026 पर्यंत ऑनलाइन सुरू आहे. अधिक माहिती, सहभाग आणि संपूर्ण सूचीसाठी अधिकृत पंतप्रधान स्मृतिचिन्ह ई-लिलाव पोर्टल pmmementos.gov.in ला भेट देता येईल.

पश्चिम बंगालच्या संग्रहातील प्रमुख स्मृतिचिन्हांमध्ये पुढील स्मृतिचिन्हांचा समावेश आहे:

संग्रहातील दोन स्मृतिचिन्हांमध्ये प्रसिद्ध भारतीय आध्यात्मिक नेते आणि संत बाबा लोकेनाथ यांच्या मूर्ती आहेत. आध्यात्मिक प्रबोधन, योग आणि भक्तीविषयक त्यांच्या शिकवणीमुळे त्यांना आदराचे स्थान आहे. यापैकी एका मूर्तीची निर्मिती सिरॅमिकपासून करण्यात आली असून, दुसरी मूर्ती वेगळ्या साहित्यापासून तयार करण्यात आली आहे.

आणखी एका स्मृतिचिन्हात पश्चिम बंगालशी संबंधित पारंपरिक साहित्य असलेल्या शोलापासून तयार केलेल्या कलाकृतीत देवी दुर्गेचा चेहरा साकारण्यात आला आहे.

पश्चिम बंगालच्या वैशिष्ट्यपूर्ण वारसा वास्तूचे दर्शन घडवणाऱ्या आणखी एका स्मृतिचिन्हात वेतापासून विणकाम करण्यात आले आहे. या स्मृतिचिन्हातील बारकाईने केलेले विणकाम आणि नैसर्गिक पोत ग्रामीण वारशाशी निगडित शाश्वत हस्तकलेचे प्रतिबिंब आहे.

या संग्रहातील आणखी एका स्मृतिचिन्हात हाताने कोरलेल्या लाकडी बांकुरा घोड्यांची जोडी आहे. हे घोडे पश्चिम बंगालच्या लोककला वारशाचे प्रतिनिधित्व करतात. उंचावलेली मान, ताठ कान आणि भौमितिक आकार ही पंचमुरा कलाशैलीशी संबंधित या शिल्पांची वैशिष्ट्ये आहेत.

एकत्रितपणे, ही 109 स्मृतिचिन्हे पश्चिम बंगालच्या भक्तीपरंपरा, लोककला आणि हस्तकला, वास्तुशिल्पीय वारसा, साहित्यिक आणि कलात्मक परंपरा तसेच समकालीन कलेच्या माध्यमातून राज्याच्या समृद्ध सांस्कृतिक वारशाचे व्यापक दर्शन घडवतात.