डब्ल्यूटीएम लंडन २०२५ मध्ये गोवा पर्यटनाची जागतिक पातळीवर प्रभावी उपस्थिती

गोवा खबर : गोवा पर्यटन विभागाने वर्ल्ड ट्रॅव्हल मार्केट (डब्ल्यूटीएम) लंडन २०२५  मध्ये दमदार सुरुवात करत जागतिक पर्यटन क्षेत्रातील भागीदार आणि उद्योग प्रतिनिधींचे विशेष लक्ष वेधून घेतले. गोवा पॅव्हेलियनमध्ये सतत गर्दी दिसून आली, जिथे पर्यटक आणि उद्योग प्रतिनिधींनी गोव्याची समृद्ध संस्कृती, विविध पर्यटन अनुभव, अध्यात्मिक ठिकाणे, ग्रामीण पर्यटन आणि विकसित होणारी पायाभूत सुविधा यांविषयी उत्साहाने माहिती घेतली.

गोवा पर्यटनाने या जागतिक मंचावर संस्कृती, वारसा, पाककला आणि अनुभवाधारित पर्यटन यावर लक्ष केंद्रीत केले, ज्यातून समुदायाभिमुख आणि पुनरुत्थानात्मक पर्यटनाला चालना देण्याच्या राज्याच्या बांधिलकीचे दर्शन घडले. डब्ल्यूटीएम लंडन मधील सहभागाने हे अधोरेखित केले की गोवा आता पर्यटकांना खऱ्या अर्थाने स्थानिक अनुभव, गोष्टी सांगणारे पर्यटन आणि समुदायाशी जवळीक असलेले प्रवास अनुभव देण्यासाठी नवे मार्ग निर्माण करत आहे.

गोवा पॅव्हेलियनचे उद्घाटन भारताचे युकेमधील उपउच्चायुक्त कार्तिक पांडे (आयएफएस), पर्यटन मंत्री रोहन खंवटे; राकेश दहिया (आयआरएस), फर्स्ट सेक्रेटरी (ट्रेड आणि टुरिझम), हाय कमिशन ऑफ इंडिया, लंडन; संजीव आहुजा (आयएएस), सचिव (पर्यटन); संदीप जॅक्स (आयएएस), सचिव (राजस्व); कुलदीप अरोलकर, व्यवस्थापकीय संचालक, जीटीडीसी; जयेश काणकोणकर, सहाय्यक संचालक (पर्यटन) आणि शॉन मेंडीस, पर्यटन मंत्र्याचे ओएसडी यांच्या उपस्थितीत झाले.

या प्रसंगी पर्यटन क्षेत्रातील अग्रगण्य संस्थांचे प्रतिनिधी, शेख इस्माईल (कॉनकॉर्ड एग्जोटीक), दीपक भटनागर (मिनार ट्रॅव्हल्स), अनुप (लेट्स गोवा) आणि मार्टिन जोसेफ थायपोडाथ (फ्रिडम हॉलिडेज) — हे देखील उपस्थित होते. गोवा प्रतिनिधिमंडळाने जागतिक पर्यटन व्यवसाय आणि माध्यम प्रतिनिधींसोबत फलदायी चर्चा करून सहकार्याचे नवे मार्ग खुले केले.

खंवटे म्हणाले, “गोवा पर्यटनाचा सहभाग हा आपल्या पर्यटन व्यवस्थेला अधिक मजबूत आणि समुदाय–केंद्रित बनविण्याच्या आमच्या सातत्यपूर्ण प्रयत्नांचा भाग आहे. आम्ही संस्कृती, वारसा, आरोग्य आणि अध्यात्माशी निगडित पर्यटन अनुभवांना प्रोत्साहन देत आहोत, जे पर्यटकांना राज्याशी अधिक आत्मीयतेने जोडतात. आमचे ध्येय आहे – सर्वांसाठी सुलभ, सर्व ऋतूंमध्ये आकर्षक आणि उबदार स्वागत करणारा गोवा साकार करणे.”

जीटीडीसीचे व्यवस्थापकीय संचालक कुलदीप अरोलकर म्हणाले, “गोवा पर्यटनाच्या उद्दिष्टांशी आम्ही पूर्णपणे संलग्न आहोत. पर्यटकांच्या सहभागात वाढ आणि सर्वसमावेशक पर्यटनाच्या दिशेने वाटचाल हे आमचे ध्येय आहे. डब्ल्यूटीएम सारख्या आंतरराष्ट्रीय मंचांवर सहभागामुळे शाश्वत वाढीसाठी नवे सहकार्य आणि संधी उपलब्ध होतात.”

केदार नाईक यांनी सांगितले, “आमचे लक्ष गोव्याला जबाबदार आणि अनुभवाधारित पर्यटन स्थळ म्हणून ओळख मिळवून देण्यावर आहे. यासाठी आम्ही नवीन पर्यटन परिपथ विकसित करणे, स्थानिक संस्कृतीला अधोरेखित करणे आणि पर्यटकांचा अनुभव अधिक समृद्ध करण्यासाठी सातत्याने प्रयत्न करत आहोत.”

संस्कृती, वारसा, खाद्यपदार्थ आणि अनुभवाधारित पर्यटनावर भर देत, गोवा पर्यटनाने गोवा बियॉन्ड बिचेस या संकल्पनेद्वारे समुदायाभिमुख आणि शाश्वत पर्यटनाला चालना देण्याची आपली बांधिलकी पुन्हा अधोरेखित केली.

डब्ल्यूटीएम लंडन २०२५ मधील गोव्याच्या सहभागामुळे राज्याचे जागतिक स्तरावर संबंध अधिक दृढ होणार असून, गोवा हे संस्कृती, समुदायकल्याण आणि अर्थपूर्ण प्रवास अनुभवांनी नटलेले पर्यटन स्थळ म्हणून अधिक ठळकपणे ओळखले जाईल.