गोवा राज्य सांस्कृतिक पुरस्कार आणि सर्वोत्कृष्ट सांस्कृतिक संस्था पुरस्कार जाहीर

गोवा खबर : कला आणि संस्कृती संचालनालय, कला आणि संस्कृती क्षेत्रातील 12 व्यक्तींना 2024-25 मध्ये संगीत, नाटक, तियात्र, लोककला, भजन, कीर्तन, शिल्प, साहित्य, चित्रकला या क्षेत्रात दिलेले योगदान आणि कामगिरीबद्दल ’गोवा राज्य सांस्कृतिक पुरस्कार’ देऊन सन्मानित करण्यात येणार आहे.

या पुरस्कारासोबतच दरवर्षी एका सांस्कृतिक संस्थेचा सर्वोत्कृष्ट सांस्कृतिक संस्था पुरस्कारासाठी विचार केला जातो. 2024-25 चा सर्वोत्कृष्ट सांस्कृतिक संस्था पुरस्कार प्राप्तकर्ता कुंभारजुवा येथील शांतादुर्गा कल्चरल संघ आहे. प्रत्येकी 1 लाख रुपये रोख, श्रीफळ, शाल, प्रमाणपत्र आणि नटराज प्रतिकृती असे या पुरस्कारांचे स्वरूप आहे. 3 लाख रुपये रोख आणि स्मृतिचिन्ह असे सर्वोत्कृष्ट सांस्कृतिक संस्थेच्या पुरस्काराचे स्वरूप आहे.

पेडणे तालुक्यातील दामोदर शेवडे आणि सासष्टी तालुक्यातील आगोस्तिन्हो फ्रान्सिस्को झेवियर जुवाव द क्रुझ हे संगीत क्षेत्रातील गोवा राज्य सांस्कृतिक पुरस्कार प्राप्तकर्ते आहेत. भजन, नाटक क्षेत्रात पेडणे तालुक्यातील सुरेश बांदेकर, कीर्तन क्षेत्रात सत्तरी तालुक्यातील विवेक जोशी, भजन क्षेत्रात आनंद आमोणकर आणि गुरुदास गावकर हे दोघेही डिचोली तालुक्यातील आहेत. नाट्यक्षेत्रात धारबांदोडा येथील गजानन नाईक आणि तिसवाडी येथील अमृतराव भोसले, तियात्र क्षेत्रात सासष्टी तालुक्यातील शेरॉन माझारेलो, लोककला आणि कला क्षेत्रात फोंडा तालुक्यातील सुहासिनी नाईक, तिसवाडी तालुक्यातील साहित्य क्षेत्रात नयना आडारकर आणि लक्ष्मण पित्रे हे गोवा राज्य सांस्कृतिक पुरस्काराचे मानकरी आहेत.

खात्यातर्फे एका विशेष कार्यक्रमात पुरस्कारांचे वितरण करण्यात येणार असल्याचे कळवण्यात आले आहे.