गोवा खबर : होमगार्ड्स हे अनसिंग हिरो आहेत, शांततेचे रक्षक आहेत, जे समाजाचे कामकाज विशेषत: संकटकाळात सुरळीतपणे चालावेत यासाठी पडद्यामागे तत्परतेने काम करतात . होमगार्ड्स हे बांधिलकी, शौर्य आणि नि:स्वार्थीपणाचे प्रतीक आहे जे आपत्कालीन परिस्थितीत पोलिसांना मदत करण्यासाठी नैसर्गिक आपत्तीच्या वेळी मदत करतात, असे प्रतिपादन महासंचालक आलोक कुमार यांनी केले.
पोलीस मुख्यालय पणजी येथे आज गृहरक्षक दल आणि नागरी संरक्षण स्वयंसेवकांच्या ६२ व्या स्थापना दिनानिमित्त आयोजित कार्यक्रमात कुमार बोलत होते.
गोवा होमगार्ड्सची स्थापना कायद्याची अंमलबजावणी करणाऱ्या एजन्सींच्या प्रयत्नांना चालना देण्याच्या उद्देशाने करण्यात आली आहे. सार्वजनिक अशांततेच्या वेळी कायदा आणि सुव्यवस्था किंवा पूर, भूकंप आणि इतर नैसर्गिक आपत्तींच्या वेळी बचाव कार्यात ते सतत मदत करतात असा पुनरुच्चार त्यांनी केला.
नागरी संरक्षणाचे उपनियंत्रक शर्मिला झुझार्टे यांनी होमगार्ड आणि नागरी संरक्षण स्वयंसेवकांच्या भूमिकेवर प्रकाश टाकला. महाराष्ट्रात सुमारे ३०० नागरी संरक्षण स्वयंसेवक निवडणूक कर्तव्यासाठी तैनात करण्यात आले होते अशी माहिती दिली.
कुमार यांना नागरी संरक्षण दलाने मानवंदना दिली. डीआयजीपी गोवा पोलीस अजय शर्मा, पोलीस अधिक्षक, एसपीसीआर/पिंक फोर्स इझिल्डा डिसोझा, पोलीस अधिक्षक, डीवायएसपी, नागरी संरक्षण स्वयंसेवक, मुख्य वॉर्डन, नागरी संरक्षण विभागाचे वॉर्डन यावेळी उपस्थित होते.
सुलक्षा गावस यांनी सूत्रसंचालन केले तर नागरी संरक्षणाचे वैद्यकीय अधिकारी डॉ. विजय पराड यांनी आभार मानले.
