गोवा खबर
तमनारच्या ध्यासाने भाजप सरकारचे वीज खात्याकडे दुर्लक्ष : कॅप्टन.विरियातो फर्नांडिस
गोवा खबर: विध्वंसक तमनार प्रकल्पाचे वेड लागलेल्या भाजप सरकारने कामावर असलेल्या वीज कर्मचाऱ्यांसाठीच्या सुरक्षा उपायांकडे पूर्णपणे दुर्लक्ष केले. आज विजेच्या धक्क्याने प्राण गमावलेल्या महेश जांबावलीकर यांच्या कुटुंबीयांना माझ्या संवेदना. मी वीजमंत्री सुदिन ढवळीकर यांच्या तात्काळ राजीनाम्याची मागणी करतो, असे प काँग्रेसचे दक्षिण गोव्याचे उमेदवार कॅप्टन विरियातो फर्नांडिस यांनी म्हटले आहे.
वीजमंत्री सुदिन ढवळीकर यांना गोव्याचे वीजमंत्री म्हणून राहण्याचा अधिकार नाही. स्वत:च्या विभागातील कर्मचाऱ्यांना सुरक्षा प्रदान करण्यात ते अपयशी ठरले आहेत. त्यांच्या निष्काळजीपणाच्या कृत्याचा मी निषेध करतो, असे कॅप्टन विरियातो फर्नांडिस म्हणाले.
गोव्यात गेल्या ५ वर्षांत वीज वितरण प्रणालीची देखभाल आणि सुधारणा करण्यासाठी सरकारने जवळपास १२ हजार कोटी रुपये खर्च केले आहेत. मात्र ही रक्कम वीजमंत्री आणि भाजप कार्यकर्त्यांच्या तिजोरीत गेली आहे. त्यामुळे गोमंतकीयांना सतत वीज खंडित होण्याचा सामना करावा लागत आहे, असा दावा कॅप्टन विरियातो फर्नांडिस यांनी केला.
वीज खाते म्हणजेच एक मोठा घोटाळा झाला आहे. औद्योगिक, व्यावसायिक आणि सरकारी थकबाकीदारांकडून 1400 कोटींची वसुली प्रलंबित आहे, परंतु सरकार गरीब घरगुती ग्राहकांना लक्ष्य करत आहे, असे कॅप्टन विरियातो फर्नांडिस म्हणाले.
दक्षिण गोवा 7 मे रोजी श्रीमंत समर्थक आणि गरीब विरोधी भाजप सरकार नाकारेल आणि लोकशाही वाचवा आणि गोवा वाचवा याला मत देईल , असा विश्वास कॅप्टन विरियातो फर्नांडिस यांनी व्यक्त केला.
