गोवा खबर
गोव्याच्या बाहेरून अॅप आधारित टॅक्सी ऑपरेटर आणण्यासाठी सरकार मोपा येथे टॅक्सी काउंटर देत नाही – अमित पाटकर
गोवा खबर: भाजप सरकार गोव्यातील प्रमुख सार्वजनिक सेवा क्रोनी कॅपिटलिस्टच्या हाती सोपवण्याच्या तयारीत आहे हे स्पष्ट आहे. गोव्याबाहेरून अॅपवर आधारित टॅक्सी ऑपरेटर आणण्याचा छुपा अजेंडा असल्यानेच भाजप सरकार स्थानिक टॅक्सी चालकांना टॅक्सी काउंटर देण्यास जाणूनबुजून विलंब करत आहे, असा आरोप काँग्रेस अध्यक्ष अमित पाटकर यांनी केला.
काँग्रेस अध्यक्षांनी “टूगेदर फॉर मोपा एअरपोर्ट” या बॅनरखाली मोपा आंतरराष्ट्रीय विमानतळावर टॅक्सी काउंटरची मागणी करणाऱ्या आंदोलक टॅक्सी ऑपरेटरची भेट घेतली. काँग्रेसचे नेते अॅड. जितेंद्र गावकर, उत्तर गोवा जिल्हाध्यक्ष वीरेंद्र शिरोडकर, विजय भिके आदी उपस्थित होते आणि त्यांनी आंदोलनकर्त्या टॅक्सी चालकांना पाठिंबा दिला.
गोव्यात ओला आणि उबेर आणण्याच्या परिवहन मंत्री मॉविन गुदिन्हो यांनी केलेल्या विधानाची गोव्यातील जनतेला आठवण करून देताना अमित पाटकर म्हणाले की, भाजप सरकारचे दोन मंत्री गोव्याबाहेरील व्यावसायीकांना हाताशी धरुन अॅप आधारित टॅक्सी सेवा सुरू करण्याच्या प्रक्रियेत असल्याची विश्वसनीय सूत्रांकडून मला माहिती मिळाली आहे.
काँग्रेस पक्षाने नेहमीच गोव्यातील जनतेच्या भावनांचा आदर केला आहे. आमच्या काँग्रेस सरकारने भूतकाळात गोमंतकीयांच्यालमागणीवरून तीन सेझ आणि प्रादेशिक आराखडा रद्द केला, असे अमित पाटकर म्हणाले.
काँग्रेस पक्षाची मागणी आहे की सरकारने स्थानिक टॅक्सी चालकांबद्दल सहानुभूतीपूर्वक दृष्टीकोन ठेवला पाहिजे. मोपा विमानतळासाठी पेडणे तालुक्यातील जनतेने खुप मोठा त्याग केला असून, त्यांनानशासनाने प्राधान्याने सहकार्य दिले पाहिजे, असे अमित पाटकर म्हणाले.
