मच्छीमारी समाप्ती जागतिक दिनानिमित्त गोवा अ‍ॅनिमल लिबरेशन मूव्हमेंटचा जनजागृती उपक्रम

गोवा खबर : मच्छीमारी व मत्स्यपालन समाप्ती जागतिक दिन (डब्ल्यूओ डीईएफ) निमित्तगोवा अ‍ॅनिमल लिबरेशन मूव्हमेंटतर्फे २८ मार्च २०२६ रोजी मिरामार नदी प्रोमेनेड येथे जनजागृती मोहीम राबविण्यात आली.

या उपक्रमाचा उद्देश मासे, खेकडे आणि ऑक्टोपस यांसारख्या जलचर प्राण्यांच्या हितांचा विचार करण्याची गरज अधोरेखित करणे हा होता. आयोजकांनी नमूद केले की हे प्राणी संवेदनशील आणि बुद्धिमान आहेत. सॅल्मनसारख्या माशांना हजारो किलोमीटरचे मार्ग लक्षात ठेवण्याची क्षमता असते, तर क्रस्टेशियन प्राणी केवळ प्रतिक्षिप्त क्रियेपलीकडे जाऊन वेदना टाळण्याचा सक्रिय प्रयत्न करतात.

मोहीमेदरम्यान जलचर प्राण्यांवर होणाऱ्या जागतिक स्तरावरील हानीकडे लक्ष वेधण्यात आले. दरवर्षी मासेमारी नौका व मत्स्यपालन केंद्रांमुळे सुमारे दोन हजार अब्ज मासे आणि पंचवीस हजार अब्ज कोळंबी मारली जाते, असे सांगण्यात आले. या प्राण्यांना दीर्घकाळ यातना सहन कराव्या लागतात. काही मासे मासेमारी नौकांवर तासन्तास तडफडत राहतात, तर मत्स्यपालन व्यवस्थेत त्यांना ऑक्सिजनची कमतरता, अतिगर्दी, परजीवी संसर्ग आणि तणावपूर्ण पद्धती यांसारख्या प्रतिकूल परिस्थितीचा सामना करावा लागतो.

मोहीमेत असेही अधोरेखित करण्यात आले की जलचर प्राणी वेदना व जाणीव अनुभवू शकतात, त्यामुळे त्यांच्या हिताचा विचार करणे आवश्यक आहे. वैज्ञानिक दृष्टिकोनानुसार जलचर प्राण्यांचे सेवन करणे आवश्यक नाही, म्हणून मच्छीमारी व मत्स्यपालन या टाळता येण्याजोग्या पद्धती आहेत, असेही सांगण्यात आले.

यावेळी बोलताना जेमिनी शेट्टीगर म्हणाल्या, “या जनजागृती मोहिमेचा उद्देश दिसून न येणाऱ्या आणि आवाज नसलेल्या जलचर प्राण्यांना आवाज देणे हा आहे. त्यांना सहन करावी लागणारी वेदना प्रचंड आहे. समाजाने या प्राण्यांची संवेदनशीलता ओळखून अधिक मानवी आणि शाश्वत जीवनशैलीकडे वाटचाल करावी, अशी आमची अपेक्षा आहे.”

गोवा अ‍ॅनिमल लिबरेशन मूव्हमेंटने पुढे सांगितले की २०१७ पासून जगभरातील प्राणी हक्क संघटना मच्छीमारी व मत्स्यपालन समाप्त करण्यासाठी एकत्र येत आहेत. यावर्षी जगभरातील १९० हून अधिक संस्थांनी रस्त्यावर आणि ऑनलाईन उपक्रमांद्वारे जलचर प्राण्यांच्या वेदनांविषयी जनजागृती केली.