गोवा खबर
वागातोर येथील रोमियो लेनवरील अतिक्रमणाविरुद्ध पर्यटन विभागाची कारवाई
गोवा खबर: गोवा सरकारच्या पर्यटन विभागाने आज वागातोर येथे “रोमियो लेन” या नावाने चालणाऱ्या अतिक्रमणावर केलेल्या कारवाईबाबत खालील माहिती दिली आहे.
ही कारवाई पर्यटन विभागाच्या हद्दीत अतिक्रमण करून उभारलेल्या अनधिकृत बांधकामावर करण्यात आली. पडताळणीत हे बांधकाम बेकायदेशीर असल्याचे आढळले. संबंधित नियमांचे उल्लंघन झाल्याने कायद्यानुसार त्यावर पाडकामाची कारवाई करण्यात आली.
विशेष म्हणजे, याच ठिकाणावरील अनधिकृत बांधकामावर २०२४ मध्येही अशाच कारणांसाठी पाडकामाची कारवाई झाली होती. तरीदेखील परवानगीशिवाय ते पुन्हा उभारण्यात आले होते, त्यामुळे पर्यटन विभागाला पुन्हा कारवाई करावी लागली.
पर्यटन विभागाने स्पष्ट केले आहे की ते खासगी शॅक्स नोंदणी करणारे प्राधिकरण आहे; मात्र परवाना देणारे प्राधिकरण नाही.
वागातोरमधील ही संरचना समुद्रकिनाऱ्यावर असल्यामुळे पर्यटन विभागाच्या कार्यक्षेत्रात येते. मात्र हडफडे येथे असलेले “बर्च बाय रोमियो लेन”, जिथे आगीची घटना घडली होती, ते पर्यटन नियमन कायद्याच्या कक्षेबाहेर आहे.
पर्यटनमंत्री मा. रोहन खंवटे म्हणाले,
“पर्यटन विभागाचे काम म्हणजे त्यांच्या कार्यक्षेत्रातील अनधिकृत बांधकामे, बेकायदेशीर उपक्रम, दलाल, आणि पर्यटनाची प्रतिमा खराब करणाऱ्या गोष्टींवर कडक कारवाई करणे. अशा कारवाया नियमितपणे सुरू असतात आणि सुव्यवस्थित व जबाबदार पर्यटन राखण्यासाठी आवश्यक आहेत.”
पर्यटन संचालक श्री. केदार नाईक म्हणाले की पर्यटन विभागाची कारवाई पूर्णपणे कायदेशीर चौकटीत करण्यात आली. यापूर्वी पाडकाम केल्यानंतरही अनधिकृतपणे बांधकाम पुन्हा उभारले गेल्याने विभागाकडे कारवाई करण्याशिवाय पर्याय नव्हता.
पर्यटन विभागाने पुन्हा एकदा स्पष्ट केले आहे की जबाबदार पर्यटन आणि सुव्यवस्थित विकासासाठी तो कटिबद्ध आहे. सार्वजनिक जागांवर किंवा पर्यावरणीयदृष्ट्या संवेदनशील ठिकाणी कोणतेही अतिक्रमण किंवा बेकायदेशीर कृती आढळल्यास कायद्यानुसार कठोर कारवाई केली जाईल.
