रशियन पर्यटकांसोबत गोव्याचे पर्यटन संबंध अधिक दृढ; प्रतिनिधीमंडळाची पर्यटन भवनात भेट

गोवा खबर : गोवा पर्यटन विभागाने रशियातून आलेल्या सुमारे 37 सदस्यांच्या प्रतिनिधीमंडळाचे पर्यटन भवनात उत्साहाने स्वागत केले. हे प्रतिनिधी गोव्यात आठ दिवसांच्या दौर्‍यावर आहेत.

या स्वागतासाठी पर्यटन संचालक केदार नाईक, जीटीडीसीचे जनरल मॅनेजर (हॉटेल्स आणि मार्केटिंग) गॅविन डायस, पर्यटन उपसंचालक जयेश काणकोणकर, सहायक पर्यटन अधिकारी चित्रा वेंगुर्लेकर, पर्यटनमंत्र्यांचे ओएसडी शॉन मेंडिस, तसेच टीसीआय आणि एसआयटीए चे सीओओ अर्नेस्ट डायस आणि पर्यटन क्षेत्रातील इतर अधिकारी उपस्थित होते.

पर्यटनमंत्री रोहन खंवटे म्हणाले, रशियासोबत गोव्याचे अतिशय उबदार आणि जुने संबंध आहेत. रशियन पर्यटकांचा आमच्यावर असलेला विश्वास आम्हाला महत्त्वाचा आहे. आम्ही ही नाती आणखी मजबूत करण्यासाठी कटिबद्ध आहोत. प्रत्येक पर्यटकाला सुरक्षित, आनंददायी आणि संस्मरणीय अनुभव देणे आमचे ध्येय आहे.

पर्यटन संचालक केदार नाईक यांनीही रशियन अतिथींना स्वागत करताना सांगितले की, गोवा आणि रशिया यांच्यातील मैत्रीपूर्ण संबंध अनेक वर्षांपासून मजबूत आहेत. रशियन पर्यटक नेहमीच गोव्याची संस्कृती, आदरातिथ्य आणि जीवनशैली यांना मोठ्या प्रेमाने स्वीकारतात आणि गोव्याच्या पर्यटनाच्या वाढीत मोलाचा वाटा उचलतात.

टीसीआय आणि एसआयटीए चे सीओओ अर्नेस्ट डायस यांनीही अतिथींना स्वागत करून, या हंगामात येकॅतेरिनबर्ग आणि मॉस्को येथून मोठ्या प्रमाणात पर्यटक गोव्यात येतील, असा विश्वास व्यक्त केला.

या भेटीदरम्यान गॅविन डायस यांनी गोव्याच्या विविध पर्यटन संधींबाबत एक आकर्षक सादरीकरण केले. यात गोव्याची समृद्ध सांस्कृतिक परंपरा, रंगतदार सण, खाद्यसंस्कृती, वेलनेस अनुभव, साहसी पर्यटन आणि उच्च प्रतीची हॉटेल्स यांचा विशेष उल्लेख होता.

सात दिवसांच्या या दौर्‍यात प्रतिनिधीमंडळ स्पाइस प्लांटेशन्ससह गोव्यातील विविध पर्यटनस्थळांना भेट देणार आहे. त्यांनी, मिळालेल्या उबदार स्वागताबद्दल आनंद व्यक्त केला आणि गोव्याबद्दल अजून अधिक जाणून घेण्याची इच्छा व्यक्त केली.

गोवा पर्यटन विभागाला या भेटीमुळे दोन्ही देशांमधील सहकार्य आणखी वाढेल आणि गोव्याचे आंतरराष्ट्रीय पातळीवरील पर्यटन प्रोत्साहन अधिक बळकट होईल, अशी आशा आहे.