गोवा खबर: २५ ऑक्टोबर २०२५ रोजी कझाकस्तानमधील अलमाती येथून गोव्यात आलेल्या पहिल्या चार्टर फ्लाइटने २०२५–२६ च्या पर्यटन हंगामाची दमदार सुरुवात केली. एससीएटी एअरलाईन्सची फ्लाइट (एससीएटी व्हीएसव्ही५२१५) पहाटे ५:३० वाजता दक्षिण गोव्याच्या दाबोळी विमानतळावर उतरली. या फ्लाइटद्वारे आलेले उत्साही प्रवासी गोव्याच्या समुद्रकिनाऱ्यां पलीकडील विविध पर्यटन अनुभवांचा आनंद घेण्यासाठी आले आहेत.
या प्रसंगी पर्यटनमंत्री माननीय श्री. रोहन ए. खंवटे म्हणाले, “कझाकस्तानहून आलेली पहिली चार्टर फ्लाइट ही गोव्याच्या आंतरराष्ट्रीय लोकप्रियतेचे आणि वाढत्या संपर्काचे प्रतीक आहे. आम्ही विविध देशांसोबत भागीदारी वाढवत, चार्टर नेटवर्क विस्तारित करत आहोत, जेणेकरून शाश्वत आणि पुनरुत्पादक पर्यटनाची दिशा कायम राहील.”
पर्यटन संचालक श्री. केदार नाईक म्हणाले, “प्रत्येक नवीन चार्टर फ्लाइटमुळे गोव्याची ओळख एक अग्रगण्य विश्रांती स्थळ म्हणून अधिक दृढ होते. आमच्या प्रवासी भागीदार आणि हितधारकांच्या सातत्यपूर्ण प्रयत्नांबद्दल आम्ही आभारी आहोत, ज्यामुळे दाबोळी आणि मोपा दोन्ही विमानतळांवर सुरळीत कामकाज सुरू आहे.”
या पहिल्या फ्लाइटच्या आगमनानिमित्त गोवा पर्यटन विभाग, कॉनकॉर्ड एक्झॉटिक व्हॉयेजेस आणि टीटीएजी यांच्या सहकार्याने खास स्वागत समारंभ आयोजित करण्यात आला होता. प्रवाशांचे स्वागत ब्रास बँडच्या तालावर, फुलांच्या हारांनी करण्यात आले. यानंतर केक कापून चार्टर हंगामाची औपचारिक सुरुवात करण्यात आली.
ही उद्घाटन फ्लाइट येत्या काही आठवड्यांत विविध देशांतून येणाऱ्या अनेक चार्टर फ्लाइट्सच्या सुरुवातीचे द्योतक आहे. गोवा पर्यटन विभाग “गोवा बियाँड बिचेस” या उपक्रमांतर्गत सांस्कृतिक, साहसी, वेलनेस आणि वारसा आधारित पर्यटन अनुभव अधिक समृद्ध करण्यावर लक्ष केंद्रित करत आहे.
