गोव्यातील सर्जनशील समुदायाने ‘डिझाईन थिंकिंग’च्या ताकदीचा घेतला शोध; फर्स्ट फ्रायडेजच्या १७व्या आवृत्तीत उत्साही सहभाग

गोवा खबर : गोव्याच्या सर्जनशील समुदायाला एकत्र आणणाऱ्या फर्स्ट फ्रायडेजच्या १७व्या आवृत्तीने प्रेरणा आणि शिक्षणाचा एक आगळावेगळा कार्यक्रम सादर केला. हा कार्यक्रम क्रिएटिव्ह कम्युनिटी ऑफ गोवा आणि असोसिएशन ऑफ डिझाइनर्स ऑफ इंडिया (एडीआय) – गोवा चॅप्टर यांच्या संयुक्त विद्यमाने आणि स्टार्टअप आणि आयटी प्रमोशन सेल (एसआयटीपीसी) यांच्या सहकार्याने आयोजित करण्यात आला होता. या सत्राचा केंद्रबिंदू होता, “डिझाईन थिंकिंगची परिवर्तनकारी ताकद.”

हा कार्यक्रम ३ ऑक्टोबर २०२५, शुक्रवार, रोजी बिझ नेस्ट, को-वर्कींग स्पेस पाटो, पणजी येथे पार पडला. सत्रात प्रमुख वक्ते म्हणून उपस्थित होत्या डॉ. स्नेहा भट, सहाय्यक प्राध्यापक (स्ट्रॅटेजी आणि कन्सल्टिंग विभाग), गोवा इन्स्टिट्यूट ऑफ मॅनेजमेंट (जीआयएम). त्यांनी डिझाईन प्रक्रियेत ग्राहकांच्या गरजा आणि अनुभव यांना केंद्रस्थानी ठेवण्याचे महत्त्व स्पष्ट केले.

त्यांनी सांगितले, “डिझाईन थिंकिंग म्हणजे मुळात युजर-सेंट्रिक विचार, म्हणजेच वापरकर्त्यांच्या गरजा ओळखून त्यांना अनुकूल अशी रचना तयार करणे. यात फक्त उत्पादन बनवणे नव्हे, तर त्यांच्यासाठी अनुभव तयार करणे महत्त्वाचे आहे.”

डॉ. स्नेहा यांनी पारंपरिक साधने जसे की सर्वेक्षण, जी आकडे आणि डेटा देतात, आणि डिझाईन थिंकिंगचा सहानुभूतीपूर्ण दृष्टिकोन यातील फरक स्पष्ट केला. ॲपल कंपनीचा आयफोन त्यांनी उदाहरण म्हणून समोर ठेवला, “ॲपलने तीन वेगवेगळी उपकरणे एकत्र करून एक उत्पादन तयार केले, पण त्यांचा खरा फोकस होता वापरकर्ते डिव्हाइसशी कसे संवाद साधतात. त्यांनी वापरकर्त्यांचे निरीक्षण करून ‘पिंच टू झूम’ सारखी वैशिष्ट्ये विकसित केली.”

त्यांनी डिझाईन थिंकिंगच्या ५ प्रमुख टप्प्यांचे स्पष्टीकरण दिले, सहानुभूती, समस्या निश्चित करणे, कल्पना निर्माण करणे, नमुना तयार करणे आणि चाचणी करणे. प्रत्येक टप्पा हा वापरकर्त्याला समजून घेण्यावर आणि उपाय सुधारत नेण्यावर आधारित आहे, असे त्यांनी स्पष्ट केले.

या सत्रातून गोव्याच्या डिझाइनर्स, सर्जनशील व्यावसायिक आणि स्टार्टअप संस्थापकांना डिझाईन थिंकिंग त्यांच्या कामात कसे वापरावे याचे व्यावहारिक ज्ञान मिळाले, मग ते उत्पादन डिझाईन असो किंवा संस्थात्मक नियोजन.

स्टार्टअप आणि आयटी प्रमोशन सेलचे मुख्य कार्यकारी अधिकारी (सीईओ) श्री. डी. एस. प्रशांत यांनी सांगितले, “गोवा आज स्टार्टअप्स आणि डिझाईन-आधारित उद्योगांच्या वाढीसाठी अनुकूल परिसंस्था निर्माण करत आहे. आम्ही गोव्याला ‘डिझाईन डेस्टिनेशन’म्हणून विकसित करत आहोत, जिथे स्थानिक डिझाइनर्स आणि स्टार्टअप्सचा सहभाग महत्त्वाचा आहे. क्रिएटिव्ह कम्युनिटी ऑफ गोवा हे या दिशेने मोठे योगदान देत आहे. तसेच, डिझाइन क्षेत्रासाठी नवी ड्राफ्ट डिझाईन पॉलिसी तयार करण्यात आली असून तिच्यावर अभिप्राय मागवला जात आहे.”

ही १७वी आवृत्ती गोव्याच्या सर्जनशील समुदायासाठी कल्पना मांडण्याचे, नेटवर्किंगचे आणि नव्या विचारांची देवाणघेवाण करण्याचे एक व्यासपीठ ठरली. या उपक्रमाने गोव्याला भारताची क्रिएटिव्ह कॅपिटल बनवण्याच्या दृष्टीला अधिक बळ दिले आहे. एक असे केंद्र जिथे नवकल्पना, डिझाईन आणि सर्जनशीलता खऱ्या अर्थाने फुलते.