मुख्यमंत्र्यांहस्ते नवीन अग्निशमन दलाच्या वाहनांचे लोकार्पण

गोवा खबर:आपत्कालीन प्रतिसाद क्षमता बळकट करण्याच्या सरकारच्या वचनबद्धतेवर जोर देत मुख्यमंत्री डॉ. प्रमोद सावंत यांनी आज सांतीनेझ येथील अग्निशमन आणि आपत्कालीन सेवा संचालनालयात नव्याने दाखल झालेल्या अग्निशमन वाहनांच्या ताफ्याला हिरवा झेंडा दाखवून लोकार्पण केले. या आधुनिक ताफ्याचा समावेश हा राज्याच्या अग्निसुरक्षा पायाभूत सुविधा वाढविणे, आपत्ती सज्जता सुधारणे आणि संपूर्ण गोव्यात जलद, तंत्रज्ञान-आधारित आपत्कालीन सेवा देण्याच्या दिशेने एक महत्त्वपूर्ण पाऊल आहे.

राज्याच्या आपत्कालीन ताफ्यात मोठी सुधारणा करणाऱ्या या नवीन ताफ्यात आठ मध्यम आकाराच्या पाण्याच्या टेंडर्स, एक ४२-मीटरची टर्न टेबल शिडी, एक धोकादायक पदार्थ (हॅझमॅट) प्रतिसाद वाहन आणि आठ ऑपरेशनल सपोर्ट मोटरसायकलचा समावेश आहे. भारत सरकारच्या १५ व्या वित्त आयोगाअंतर्गत अंदाजे ५.४३ कोटी रुपये खर्च करून पाच पाण्याच्या टेंडर्स खरेदी करण्यात आल्या आहेत, तर नादुरुस्त अग्निशमन वाहनांच्या जागी नवीन वाहने आणण्यासाठी गोवा सरकारच्या निधीतून अंदाजे ४.४९ कोटी रुपये किमतीच्या अतिरिक्त तीन पाण्याच्या टेंडर्स खरेदी करण्यात आल्या आहेत. या आधुनिक वाहनांच्या समावेशामुळे राज्यभरातील अग्निशमन, बचाव, आपत्ती प्रतिसाद आणि ऑपरेशनल सज्जता लक्षणीयरीत्या मजबूत होईल.

या प्रसंगी बोलताना मुख्यमंत्री डॉ. प्रमोद सावंत यांनी प्रत्येक नागरिकाची सुरक्षा आणि जीवित व मालमत्तेचे संरक्षण हे सरकारचे सर्वोच्च प्राधान्य आहे असे सांगितले. ही आधुनिक अग्निशमन वाहने आपत्कालीन प्रतिसाद क्षमता लक्षणीयरीत्या मजबूत करतील आणि आणीबाणीच्या काळात जलद, अधिक प्रभावी मदत करतील. त्यांनी १५ व्या वित्त आयोगाअंतर्गत दिलेल्या सहकार्याबद्दल भारत सरकारचे आभार मानले आणि अग्निशमन व आपत्कालीन सेवेतील अधिकारी आणि कर्मचाऱ्यांच्या समर्पित व निःस्वार्थ सेवेची प्रशंसा केली.

राज्यभरात अगनीशमन आणि आपत्कालीन सेवा अधिक मजबूत करण्यासाठी, काणकोण, कुडचडे, वास्को, पिळर्ण, पेडणे, मडगाव आणि फोंडा येथील अग्निशमन केंद्रांमध्ये आधुनिक वाहने आणि यंत्रणा उपलब्ध करण्यात येईल असेही त्यांनी सांगितले.

या कार्यक्रमाला अग्निशमन आणि आपत्कालीन सेवा संचालक श्री नितीन रायकर व इतर अधिकारी उपस्थित होते.