पर्यटनमंत्री खंवटे यांची दक्षिण गोव्यातील समुद्रकिनाऱ्यांना भेट : प्रस्तावित पायाभूत सुविधा व सुशोभीकरण कामांची पाहाणी

गोवा खबर : पर्यटन मंत्री रोहन अशोक खंवटे यांनी दक्षिण गोव्यातील केळशी व बाणावली समुद्र किनार्यांना भेट देऊन प्रस्तावित पायाभूत सुविधा व सुशोभीकरण कामांसाठी निश्चित करण्यात आलेल्या ठिकाणांची पाहणी केली. दक्षिण गोव्यात येणाऱ्या पर्यटकांसाठी अधिक चांगल्या सुविधा उपलब्ध करून देण्याच्या उद्देशाने ही पाहणी करण्यात आली.

यावेळी पर्यटन संचालक केदार नाईक, केळशीचे सरपंच डिक्सन व्हाज, शॅक मालक संघटनेचे अध्यक्ष क्रूझ कार्दोज तसेच पर्यटन खात्याचे इतर अधिकारी उपस्थित होते.

या भेटीदरम्यान मंत्र्यांनी समुद्रकिनाऱ्यावरील पादचारी मार्ग, सुशोभीकरणासाठी निश्चित केलेली ठिकाणे, सार्वजनिक स्वच्छतागृहांसाठी प्रस्तावित जागा तसेच इतर पर्यटन संबंधित पायाभूत सुविधांची पाहणी केली. दक्षिण गोव्यात दरवर्षी मोठ्या प्रमाणात देशी व विदेशी पर्यटक भेट देत असल्याने पर्यटन सुविधा अधिक सक्षम करण्यासाठी आणि पर्यटकांचा अनुभव अधिक चांगला करण्यासाठी सरकारतर्फे हे प्रयत्न करण्यात येत आहेत.

बाणावली समुद्रकिनाऱ्यावरील भेटीदरम्यान मंत्र्यांनी मच्छीमार, जलक्रीडा व्यवसायाशी संबंधित सदस्य तसेच शॅक ओनर्स असोसिएशनच्या प्रतिनिधींशी संवाद साधला. पर्यटन व्यवसाय, समुद्रकिनाऱ्यांची स्वच्छता, स्थानिकांच्या उपजीविकेशी संबंधित प्रश्न, स्थानिक समुदायासमोरील अडचणी तसेच विविध सुविधांबाबत चर्चा करण्यात आली. आगामी पर्यटन हंगाम सुरळीत पार पडण्यासाठी आवश्यक उपाययोजनांवर मंत्र्यांनी संबंधितांशी सविस्तर चर्चा केली.

अलीकडेच मंत्री खंवटे यांनी पर्यटन क्षेत्रातील विविध घटकांशी बैठक घेतली होती. या बैठकीदरम्यान उद्योगासमोरील अनेक समस्या त्यांच्या निदर्शनास आणून देण्यात आल्या होत्या. या प्राथमिक सूचना व अभिप्रायांच्या आधारे त्यांनी प्रत्यक्ष स्थळांना भेट देऊन परिस्थितीचा आढावा घेण्यास सुरुवात केली आहे.

माध्यमांशी बोलताना खंवटे म्हणाले की, गोवा हे देशातील एक प्रमुख पर्यटन स्थळ आहे. त्यामुळे पर्यटनाशी संबंधित पायाभूत सुविधांची स्थिती प्रत्यक्ष पाहणे आणि प्राधान्याने प्रश्न सोडवणे अत्यंत आवश्यक आहे.”
दक्षिण गोव्यात दरवर्षी मोठ्या प्रमाणावर पर्यटक येतात. त्यामुळे केळशी समुद्रकिनाऱ्यावर भेट देऊन पायाभूत सुविधा, सुशोभीकरण कामे, पादचारी मार्ग तसेच प्रस्तावित स्वच्छतागृह सुविधांची पाहणी केली. अलीकडेच पर्यटन क्षेत्रातील विविध घटकांसोबत बैठक घेऊन त्यांच्या समस्या जाणून घेतल्या होत्या. प्राप्त झालेल्या सूचनांच्या आधारे प्रत्यक्ष स्थळ पाहणी करून पर्यटक आणि संबंधित घटकांच्या अडचणी दूर करण्यासाठी प्रयत्न सुरू करण्यात आले आहेत, असे खंवटे यांनी सांगितले.

पर्यटन विभाग गोव्यातील किनारी पर्यटनस्थळांवरील सुविधा सुधारण्यासाठी, स्वच्छता राखण्यासाठी, पर्यटकांसाठी आवश्यक सोयीसुविधा उपलब्ध करून देण्यासाठी आणि शाश्वत पर्यटन विकासासाठी कटिबद्ध असल्याचेही त्यांनी यावेळी स्पष्ट केले.

पर्यटन पायाभूत सुविधा अधिक सक्षम करण्यासाठी, स्थानिक समुदाय व पर्यटन क्षेत्राशी संबंधित घटकांना सहकार्य करण्यासाठी तसेच पर्यटकांना अधिक चांगला अनुभव देण्यासाठी पर्यटन विभाग सातत्याने प्रयत्नशील असल्याचे या भेटीतून स्पष्ट झाले.

बाणावली येथे पर्यटन मंत्री खंवटे यांनी जेट स्की राईडचा अनुभव घेतला आणि स्थानिक मच्छिमार जे, पेले या नावाने ओळखले जातात, त्यांच्यासह त्यांनी जलक्रीडा उपक्रमाचा आनंद लुटला. मंत्र्यांनी समुद्री क्षेत्राची पाहणी करत असताना दक्षिण गोव्याच्या या सुदर किनारपट्टीवर साहसी जलक्रीडा उपक्रमात ते सहभागी झाले. बाणावली बीचवर साहसी पर्यटनाची मोठी क्षमता असल्याचे आणि देशी-विदेशी पर्यटकांमध्ये या ठिकाणाची लोकप्रियता अधिक वाढविण्याचे त्यांचे इरादे या भेटीने अधोरेखित झाले.