पर्यटन खात्याने अचानक केलेल्या तपासणीत शॅक धोरणाचे उल्लंघन उघड

गोवा खबर : गोवा सरकारच्या पर्यटन खात्याने राज्यातील विविध ठिकाणी बीच शॅकच्या कामकाजाची अचानक तपासणी केली. या तपासणीत गोवा शॅक धोरणाचे उल्लंघन होत असल्याचे उघड झाले असून, त्यात शॅक भाड्याने देण्याच्या घटनांचा देखील समावेश आहे. त्यामुळे नियमभंग करणाऱ्यांना कारणे दाखवा नोटीस बजावण्यात आली आहे.

या तपासणी दरम्यान, अधिकाऱ्यांना केवळ उत्तर गोव्यात एकूण ८० उल्लंघनांची प्रकरणे दिसून आली, ज्यात शॅक भाड्याने देणाऱ्यांचाही समावेश आहे. गोवा शॅक धोरणांतर्गत या शॅक्सना नोटिसा बजावण्यात आल्या आहेत. दक्षिण गोव्यात १९ शॅक्स नियमांचे उल्लंघन झाल्याचे आढळून आले आहे. शॅक्समध्ये होत असलेली बेकायदेशीरता सत्यापित करण्यासाठी आणि धोरणाचे पालन सुनिश्चित करण्यासाठी ही तपासणी करण्यात आली.

पर्यटन खात्याच्या अधिकाऱ्यांनी सांगितले, की शॅक्सना कारणे दाखवा नोटीस बजावण्यात आली आहे. शॅक मालकांना फेब्रुवारीच्या शेवटच्या आठवड्यात होणाऱ्या सुनावणी दरम्यान त्यांची बाजू मांडण्याची संधी दिली जाईल. आत्तापर्यंत, कोणताही दंड आकारण्यात आलेला नाही आणि सुनावणीची प्रक्रिया चालू आहे. पुढील तपशिलामध्ये, बिगर गोमंतकीय लोकांसाठी भाड्याने दिलेल्या शॅकची संख्या आणि त्यात गुंतलेल्या व्यवसायांची पुष्टी करणे, अद्याप बाकी आहे.

या संदर्भात नियमित तपासणी सुरू राहील आणि भविष्यात आढळलेल्या कोणत्याही उल्लंघनावर कारवाई केली जाईल, यावर अधिका-यांनी जोर दिला. अशा उल्लंघनांचा मागोवा घेण्यासाठी असलेल्या यंत्रणांसंदर्भात, खात्याने असे ठरवले आहे, की नियम पालनाचे निरीक्षण करण्यासाठी नियामक तपासणी केली जाणार आहे.

सध्या, उत्तर गोव्यातील शॅक वाटपासाठी, प्रतीक्षा यादीतील अर्जांच्या संख्येबाबत माहिती संकलित केली जात आहे. अधिकाऱ्यांनी असेही स्पष्ट केले, की तपासणी दरम्यान आढळलेल्या उल्लंघनांच्या आधारे नोटिसा जारी करण्यात आल्या आहेत. राज्याच्या पर्यटन क्षेत्राची अखंडता राखण्यासाठी गोवा शॅक धोरणाची अंमलबजावणी करण्याच्या आपल्या वचनबद्धतेचा खात्याने पुनरुच्चार केला आहे.