तिबेटमध्ये ७ रिश्टर तीव्रतेचा भूकंप; किमान १६ जणांचा मृत्यू, शेकडो घरे उद्ध्वस्त!

गोवा खबर:तिबेटमध्ये गुरुवारी रात्री ७.० रिश्टर तीव्रतेचा शक्तिशाली भूकंप झाला. या भूकंपात किमान १६ जणांचा मृत्यू झाला असून, अनेक जण जखमी झाले आहेत. भूकंपामुळे शेकडो घरे उद्ध्वस्त झाली असून मोठ्या प्रमाणात नुकसान झाले आहे.

मिळालेल्या माहितीनुसार, गुरुवारी स्थानिक वेळेनुसार रात्री १०.३३ वाजता भूकंपाचे धक्के जाणवले. भूकंपाचा केंद्रबिंदू चीनच्या तिबेटमधील दुर्गम डोंगराळ भागात होता.

हा केंद्रबिंदू नागकू शहरापासून सुमारे १९० किलोमीटर पूर्व-ईशान्य दिशेला, तर तिबेटची राजधानी ल्हासापासून सुमारे ३९० किलोमीटर ईशान्य दिशेला होता.

या शक्तिशाली भूकंपामुळे अनेक घरांची पडझड झाली असून नागरिकांमध्ये भीतीचे वातावरण निर्माण झाले आहे. प्राथमिक माहितीनुसार, किमान १६ जणांचा मृत्यू झाला असून अनेक जण जखमी झाले आहेत.