गोवा खबर : स्मार्ट वीज मीटरच्या विषयावरून वीज मंत्री सुदिन ढवळीकर यांना मुद्दाम टार्गेट करण्यासाठी मुख्यमंत्र्यांनीच माजी मुख्यमंत्री दिगंबर कामत यांना पुढे केल्याचा आरोप काँग्रेस प्रदेशाध्यक्ष गिरीश चोडणकर यांनी पत्रकार परिषदेत केला आहे.
चोडणकर यांनी म्हटले की, जेव्हा एक मंत्री दुसऱ्या मंत्र्याविरोधात उघडपणे बोलतो, तेव्हा मुख्यमंत्र्यांना त्याची नक्कीच कल्पना असते. दिगंबर कामत हे स्वतःहून असे पाऊल उचलणार नाहीत, त्यामुळे मुख्यमंत्र्यांनी ढवळीकर यांना अडचणीत आणण्यासाठीच कामत यांना पुढे सरसावले असावे असा संशय त्यांनी व्यक्त केला.
भाजपसोबत मगोप पक्षाची युती असली तरी आगामी विधानसभा निवडणुकीसाठी मगोपसोबत काँग्रेसने युती करण्याबाबत सध्या कोणतीही चर्चा सुरू नसल्याचे त्यांनी स्पष्ट केले. गोव्यातील जनता गेल्या १५ वर्षांपासून भाजप सरकारला सहन करत असून आगामी निवडणुकीत लोक या सरकारला नक्कीच धडा शिकवतील असा इशारा त्यांनी दिला. याशिवाय वेदांता आयर्न अँड स्टील लिमिटेडने सेबीच्या लिस्टिंग नियमांचे उल्लंघन केल्याच्या विरोधात सेबीकडे तक्रार केल्याची माहितीही त्यांनी दिली. आगामी निवडणुकीच्या दृष्टीने काँग्रेसने कामाला सुरुवात केली असून पुढील दोन महिन्यांत जनतेला भेडसावणाऱ्या विविध प्रश्नांची उत्तरे मिळतील आणि प्रत्येक मतदारसंघात पक्षाची संघटना मजबूत करण्यासाठी विविध समित्यांची स्थापना करून पदाधिकाऱ्यांवर जबाबदाऱ्या सोपवण्यात आल्याचे चोडणकर यांनी सांगितले.
