म्हापसा जिल्हा रुग्णालयातील वीज खंडित प्रकरणाची चौकशी; आरोग्य सेवांच्या बळकटीकरणासाठी नवे उपक्रम लवकरच:आरोग्यमंत्री

गोवा खबर : उत्तर गोवा जिल्हा रुग्णालय (NGDH), म्हापसा येथे आरोग्यमंत्री विश्वजीत राणे यांनी भेट देऊन सुरू असलेल्या विविध कामांचा आणि रुग्णालयाच्या कार्यप्रणालीचा सविस्तर आढावा घेतला. यावेळी अलीकडेच घडलेल्या वीज खंडित घटनेबाबतही चर्चा करण्यात आली.

राणे यांनी सांगितले की, वीज खंडित झाल्यामुळे रुग्ण आणि त्यांच्या कुटुंबीयांमध्ये निर्माण झालेल्या चिंतेची सरकारने गंभीर दखल घेतली आहे. या घटनेची चौकशी करण्याचे निर्देश देण्यात आले असून वस्तुस्थिती समोर आणून आवश्यक असल्यास योग्य सुधारात्मक उपाययोजना केल्या जातील.

बैठकीदरम्यान रुग्णालयातील आरोग्य सेवा अधिक सक्षम करण्यासाठी सुरू असलेल्या विविध प्रकल्पांचाही आढावा घेण्यात आला. रुग्णालयातील पाचवे ऑपरेशन थिएटर (OT) कार्यान्वित करण्याचे काम अंतिम टप्प्यात असून ते लवकरच सुरू होणार असल्याची माहिती देण्यात आली.

तसेच कर्करोग रुग्णांसाठी निवडक केमोथेरपी उपचार उपलब्ध करून देणारे स्वतंत्र ऑन्कोलॉजी डे केअर सेंटर देखील लवकरच सुरू करण्यात येणार आहे. यामुळे उत्तर गोव्यातील रुग्णांना विशेष आरोग्य सेवा अधिक सुलभपणे उपलब्ध होणार आहेत.

आरोग्यमंत्री राणे यांनी उत्तर गोवा जिल्हा रुग्णालयातील डॉक्टर, परिचारिका आणि कर्मचाऱ्यांच्या कार्याचे कौतुक केले. विशेषतः रुग्णालयाच्या वैद्यकीय अधीक्षक डॉ. वर्षा मुंज आणि संपूर्ण टीमने दर्जेदार आरोग्य सेवा देण्यासाठी केलेल्या समर्पित कार्याबद्दल त्यांनी आभार व्यक्त केले.

गोव्यातील आरोग्य सुविधा आणि रुग्णसेवा अधिक मजबूत करण्यासाठी सरकार कटिबद्ध असून भविष्यातही आरोग्य पायाभूत सुविधांच्या विकासावर भर दिला जाईल, असे विश्वजीत राणे यांनी सांगितले.