गोव्याला मधुमेहाचा विळखा वाढल्याचे अहवालातून स्पष्ट
गोवा खबर : केंद्रीय आरोग्य व कुटुंब कल्याण मंत्रालयाने नुकत्याच जाहीर केलेल्या २०२३-२४ च्या सर्वेक्षण अहवालानुसार गोव्यात मधुमेह आणि उच्च रक्तशर्करेचे प्रमाण कमालीचे वाढल्याचे समोर आले आहे. राज्यात सध्या प्रत्येक तीन पुरुषांपैकी एक आणि जवळपास प्रत्येक चार महिलांपैकी एक महिला उच्च रक्तशर्करेच्या विळख्यात सापडली आहे. सर्वेक्षणात गोव्यातील ३२.१ टक्के पुरुष आणि २७.५ टक्के महिलांची रक्तशर्करा पातळी १४० मिलिग्रॅम प्रति डेसिल्लिटरपेक्षा जास्त आढळली असून, ते मधुमेहाच्या नियंत्रणासाठी औषधे घेत आहेत. ही आकडेवारी राष्ट्रीय सरासरीपेक्षा (पुरुष २०.९ टक्के आणि महिला १७.८ टक्के) लक्षणीयरीत्या जास्त आहे.
या गंभीर आरोग्य समस्येसोबतच राज्यातील ४५.१ टक्के महिला आणि ४३.६ टक्के पुरुष हे अतिरिक्त वजन किंवा स्थूलत्वाच्या समस्येने ग्रस्त आहेत. दुसरीकडे, राज्यात ९९.६ टक्के प्रसूती रुग्णालयात होत असल्या तरी ४६.२ टक्के प्रसूती शस्त्रक्रियेने होत आहेत, जो आकडा राष्ट्रीय सरासरीपेक्षा खूप जास्त आहे. कुटुंब नियोजनासाठी अजूनही ३३.८ टक्के जोडपी पारंपारिक पद्धतींवर अवलंबून आहेत. दरम्यान, गोवा देशातील सर्वाधिक डिजिटली जोडलेल्या राज्यांपैकी एक म्हणून समोर आला असून, राज्यातील ९४ टक्के महिला आणि ९०.९ टक्के पुरुष इंटरनेटचा वापर करतात. उच्च रक्तशर्करा असलेल्या पुरुषांच्या प्रमाणात गोवा देशात पहिल्या क्रमांकावर असून त्यापाठोपाठ केरळचा क्रमांक लागतो. २०१९-२१ च्या सर्वेक्षणाच्या तुलनेत गोव्यात पुरुषांमधील हे प्रमाण २४.१ टक्क्यांवरून थेट ३२.१ टक्क्यांवर पोहोचले आहे, तर महिलांमध्येही यात ७ टक्क्यांची वाढ झाली असून ही परिस्थिती अत्यंत चिंताजनक मानली जात आहे.
