नॉर्डविंड एअरलाइन्स आणि फ्लाय अ‍ॅरिस्ताननच्या नियोजित चार्टर उड्डाणांमुळे गोव्यात आंतरराष्ट्रीय पर्यटकांच्या संख्येमध्ये वाढ

गोवा खबर : २ जानेवारी २०२६ – सुट्ट्यांच्या हंगामात प्रमुख आंतरराष्ट्रीय देशांतून आलेल्या अनेक चार्टर उड्डाणांमुळे गोव्यात मोठ्या प्रमाणात आंतरराष्ट्रीय पर्यटक दाखल झाले असून, राज्याची जागतिक हवाई जोडणी अधिक मजबूत झाली आहे.

३० डिसेंबर २०२५ रोजी मॉस्कोहून नॉर्डविंड एअरलाइन्सचे चार्टर विमान गोव्यात दाखल झाले, ज्यामध्ये ३६० प्रवासी होते. त्यानंतर ३१ डिसेंबर २०२५ रोजी येकॅटेरिनबर्गहून नॉर्डविंड एअरलाइन्सचे आणखी एक चार्टर विमान ३७३ प्रवाशांसह गोव्यात आले. तसेच ३० डिसेंबर २०२५ रोजी फ्लाय अ‍ॅरिस्तानने अस्ताना (कझाकस्तान) येथून चार्टर उड्डाण चालवले, ज्यामध्ये १७६ प्रवासी होते. यामुळे मध्य आशियातील देशांमधून गोव्याबद्दल वाढता रस दिसून येतो.

चार्टर उड्डाणांच्या स्वागतावेळी पर्यटन मंत्री रोहन खंवटे म्हणाले, “रशिया आणि मध्य आशियासारख्या बाजारपेठांमधून सातत्याने येणारी चार्टर उड्डाणे गोवा हा पसंतीचा पर्यटनस्थळ म्हणून आंतरराष्ट्रीय स्तरावर वाढत असलेल्या विश्वासाचे द्योतक आहेत. दर्जेदार पर्यटनाला चालना देणे आणि पर्यटकांना सुलभ व समृद्ध अनुभव देणे, यासाठी हवाई जोडणी मजबूत करणे हे आमच्या दृष्टीकोनाचे केंद्रबिंदू आहे.”

पर्यटन संचालक केदार नाईक म्हणाले,“चार्टर उड्डाणे आंतरराष्ट्रीय पर्यटकांची संख्या स्थिर ठेवण्यासाठी महत्त्वाची भूमिका बजावतात. पर्यटन विभाग विमान कंपन्या, विमानतळ प्राधिकरण आणि पर्यटन क्षेत्रातील भागीदारांसोबत समन्वय साधून सुरळीत व्यवस्था सुनिश्चित करत आहे, तसेच नव्या आणि प्रस्थापित जागतिक बाजारपेठांमध्ये गोव्याची पोहोच वाढवण्यावर भर देत आहे.”

गोवा सरकारचा पर्यटन विभाग आंतरराष्ट्रीय हवाई जोडणी वाढवणे, नवीन देशांमधून पर्यटक आकर्षित करणे आणि नियोजनबद्ध पर्यटन उपक्रमांद्वारे गोव्याला वर्षभर पर्यटनस्थळ म्हणून पुढे नेण्यासाठी कटिबद्ध आहे.