उत्तर गोव्यात सुशासन पद्धती,उपक्रमांवर जिल्हास्तरीय कार्यशाळेचे आयोजन

गोवा खबर:उत्तर गोवा जिल्हाधिकारी कार्यालयाने सध्या सुरू असलेल्या सुशासन सप्ताहाचा एक भाग म्हणून पणजीतील कला आणि संस्कृती संचालनालयाच्या संस्कृती भवनात सुशासन पद्धती, उपक्रमांवर जिल्हास्तरीय कार्यशाळेचे आयोजन केले होते.

कार्यशाळेला श्री दौलत हवालदार, आयएएस (निवृत्त) उपस्थित होते. त्यांनी कार्यक्षमतेने आणि प्रभावीपणे सेवा देण्यासाठी प्रशिक्षित कर्मचाऱ्यांचे महत्त्व प्रतिपादले. त्यांनी राज्यातील नोकरशाहीबद्दल आणि नियमित सेवा देण्याच्या महत्त्वावर भर दिला आणि काम परिश्रमपूर्वक आणि वेळेवर केले जाईल याची खात्री केली. नवीन तंत्रज्ञानाच्या फायद्यांची माहिती देताना श्री हवालदार यांनी कारभारात मानवी मूल्य वाढविण्यासाठी समोरासमोर संपर्क खूप महत्त्वाचा आहे असे सांगितले.

उत्तर गोवा जिल्हाधिकारी श्रीमती. स्नेहा गित्ते, आयएएस यांनी यावेळी बोलताना “सुशासन म्हणजे योग्य निर्णय घेणे आणि त्यांची प्रभावी अंमलबजावणी सुनिश्चित करणे असे सांगितले. जेव्हा जनता सरकारी सेवांकडे जाते तेव्हा त्यांचे काम जलद आणि कार्यक्षमतेने हाताळले जात असल्याची खात्री जनतेला वाटली पाहिजे असे त्या म्हणाल्या.

कला आणि संस्कृतीचे संचालक श्री सगुण वेळीप, तिसवाडीच्या संयुक्त मामलेदार -२  श्रीमती संजीवनी सातार्डेकर, संयुक्त मामलेदार -३ श्री दत्तप्रसाद तोरस्कर आणि उत्तर गोव्याचे उपजिल्हाधिकारी श्री ईश्वर मडकईकर यांची यावेळी चालू सुशासन उपक्रमांवर भाषणे झाली.

या कार्यक्रमाला उपजिल्हाधिकारी श्रीमती पल्लवी मिश्रा, अतिरिक्त जिल्हाधिकारी १ श्री महादेव आरोंदेकर, मामलेदार,  उत्तर गोवा जिल्हाधिकारी कार्यालयातील अधिकारी आणि कर्मचारी  आणि इतर मान्यवर उपस्थित होते.

 उपजिल्हाधिकारी (भूसंपादन) श्री सुयश खांडेपारकर  यांनी उद्घाटनपर भाषण केले. कार्यक्रमाचे सूत्रसंचालन ब्लॉसम कॅस्टेलिनो यांनी केले तर अतिरिक्त जिल्हाधिकारी २ श्री प्रविण हिरे परब, यांनी आभार मानले.

१९ ते २४ डिसेंबर २०२४ या कालावधीत पाळण्यात येत असलेल्या चालू सुशासन सप्ताहाचा एक भाग म्हणून सरकारी खात्यांशी संबंधित सामान्य जनतेच्या तक्रारींचे निराकरण करण्यासाठी विशेष शिबिरांचे आयोजन करण्यात येत आहे.