२०२७ मध्ये सत्तेवर आल्यानंतर करापूर-सारवण येथील ‘हाऊस ऑफ अभिनंदन लोढा’चा वादग्रस्त मेगा गृहनिर्माण प्रकल्प काँग्रेस रद्द करणार : युरी आलेमाव

पक्षांतर करणाऱ्या आमदारांना काँग्रेसमध्ये पुन्हा प्रवेश नाही, तिकीटही नाही : गिरीश चोडणकर

गोवा खबर :२०२७ मध्ये काँग्रेसचे सरकार सत्तेवर आल्यानंतर करापूर-सारवण येथील ‘हाऊस ऑफ अभिनंदन लोढा ग्रुप’चा वादग्रस्त मेगा गृहनिर्माण प्रकल्प रद्द करण्यात येईल, अशी घोषणा विरोधी पक्षनेते युरी आलेमाव यांनी केली. गोव्याच्या जमिनीचे संरक्षण आणि गोमंतकीयांच्या हिताचे रक्षण करणे ही काँग्रेसची प्राथमिकता असेल, असे त्यांनी स्पष्ट केले.

दरम्यान, गोवा प्रदेश काँग्रेसचे अध्यक्ष गिरीश चोडणकर यांनी पक्षांतर करणाऱ्या आमदारांवर निशाणा साधत, जनतेचा आणि पक्षाचा विश्वासघात करणाऱ्या आमदारांना काँग्रेसमध्ये पुन्हा प्रवेश दिला जाणार नाही तसेच अशा पक्षांतर करणाऱ्यांना आगामी निवडणुकीत काँग्रेसचे तिकीटही दिले जाणार नाही, असे ठामपणे सांगितले.

काँग्रेसच्या २७ दिवसांच्या ‘गोंय राखण यात्रे’चा दहावा दिवस बिचोली आणि मये मतदारसंघात उत्स्फूर्त प्रतिसादात पार पडला. स्थानिक नागरिकांशी थेट संवाद साधत त्यांच्या समस्या आणि दैनंदिन अडचणी जाणून घेण्यावर काँग्रेस नेत्यांनी भर दिला.

भाजप सरकारच्या कथित गैरकारभाराविरोधात गोमंतकीयांमध्ये जनजागृती करण्याच्या उद्देशाने सुरू करण्यात आलेली ही यात्रा जमीन रूपांतरण, भ्रष्टाचार, कथित अनियमितता, कायदा-सुव्यवस्थेचे प्रश्न तसेच प्रशासनातील कथित गैरव्यवस्थापन यांसारख्या मुद्द्यांकडे जनतेचे लक्ष वेधत आहे. गोव्याची जमीन, अस्मिता आणि नैसर्गिक साधनसंपत्ती भावी पिढ्यांसाठी सुरक्षित ठेवण्यासाठी जनमत संघटित करण्याचा प्रयत्न या यात्रेच्या माध्यमातून केला जात आहे.

यात्रेत गोवा प्रभारी माणिकराव ठाकरे, सहप्रभारी डॉ. अंजली निंबाळकर, प्रदेशाध्यक्ष गिरीश चोडणकर, विरोधी पक्षनेते युरी आलेमाव, आमदार तथा कार्याध्यक्ष आल्टोन डी’कोस्टा, कार्लुस आल्वारीस फरेरा, सुनील कवठणकर, खजिनदार दत्ता नाईक, सामाजिक कार्यकर्ते स्वप्नेश शेर्लेकर, महिला निरीक्षक अर्चना भोमले, बॉलिवूड अभिनेते व काँग्रेस नेते भूपेश रसीन, युवक काँग्रेस अध्यक्ष आर्चित नाईक, महिला काँग्रेस अध्यक्षा डॉ. प्रतीक्षा खलप, मीडिया विभागाचे अध्यक्ष अमरनाथ पणजीकर, सोशल मीडिया विभागाचे अध्यक्ष हिमांशू तिवरेकर, आदिवासी विभागाचे अध्यक्ष रामकृष्ण जल्मी, मये ब्लॉक अध्यक्ष वासुदेव गावकर, बिचोली ब्लॉक अध्यक्ष मनोज नाईक, माजी आमदार धर्मा चोडणकर, प्रवक्ते महेश म्हांबरे, युवक काँग्रेस प्रभारी स्वप्नील पाटील यांच्यासह स्थानिक काँग्रेस नेते, पदाधिकारी, कार्यकर्ते आणि हजारो यात्रेकरू सहभागी झाले.

मये पंचायत जंक्शन येथून पदयात्रेला सुरुवात झाली. त्यानंतर ही पदयात्रा बिचोलीच्या दिशेने मार्गक्रमण करत बिचोली बसस्थानक येथे पोहोचली. दिवसाच्या कार्यक्रमाची सांगता स्थानिक कलाकारांच्या सांस्कृतिक कार्यक्रमाने झाली. गोव्याच्या समृद्ध सांस्कृतिक परंपरा आणि सामुदायिक एकतेचे दर्शन या कार्यक्रमातून घडले.

शिरगाव जत्रेतील दुर्घटनेवरून सरकारला धारेवर

विरोधी पक्षनेते युरी आलेमाव यांनी शिरगाव जत्रेदरम्यान घडलेल्या चेंगराचेंगरीच्या घटनेवरून भाजप सरकारवर टीका केली. या दुर्घटनेला जबाबदार असलेल्या अधिकारी आणि इतर संबंधितांवर सरकारने अद्याप जबाबदारी निश्चित केलेली नाही, असा आरोप त्यांनी केला. या प्रकरणात जबाबदारी निश्चित करून योग्य ती कारवाई करण्याची मागणी त्यांनी केली.

लोककल्याणकारी योजना बंद होणार नाहीत : चोडणकर

गिरीश चोडणकर यांनी भाजपकडून काँग्रेसविरोधात पसरवण्यात येत असलेल्या कथित खोट्या प्रचारावर टीका केली. काँग्रेस सत्तेवर आल्यास लोककल्याणकारी योजना बंद केल्या जातील, या भाजपच्या कथित अपप्रचाराला जनतेने बळी पडू नये, असे आवाहन त्यांनी केले.

“सामान्य जनतेला लाभदायक ठरलेल्या योजना काँग्रेस सरकार सुरूच ठेवेल. त्याचबरोबर या योजनांचा लाभ अधिकाधिक पात्र नागरिकांपर्यंत पोहोचवण्यासाठी त्या अधिक व्यापक करण्यात येतील,” असे चोडणकर यांनी स्पष्ट केले.

जनतेत भाजपविरोधात नाराजी : माणिकराव ठाकरे

माणिकराव ठाकरे यांनी गोव्यातील जनतेमध्ये भाजप सरकारविरोधात नाराजी असल्याचे सांगितले. गोंय राखण यात्रेला मिळत असलेला उत्स्फूर्त प्रतिसाद हा जनतेच्या भावना आणि सहभागाचे द्योतक असल्याचे त्यांनी नमूद केले.

दत्ता नाईक आणि सामाजिक कार्यकर्ते स्वप्नेश शेर्लेकर यांनीही यावेळी उपस्थितांना संबोधित केले.

‘यात्री कनेक्ट’मधून नागरिकांशी थेट संवाद

दिवसभरात ‘यात्री कनेक्ट’ उपक्रमांतर्गत काँग्रेस नेते व कार्यकर्त्यांनी बिचोलीतील आतील पेठ, गावकरवाडा आणि सुंदर पेठ परिसराला भेट देऊन स्थानिक नागरिकांशी थेट संवाद साधला. नागरिकांच्या दैनंदिन जीवनातील अडचणी, स्थानिक प्रश्न आणि त्यांच्या अपेक्षा जाणून घेण्याचा प्रयत्न यावेळी करण्यात आला.

जनतेशी थेट संवाद हा गोंय राखण यात्रेचा प्रमुख भाग असून, गोव्याच्या विविध भागांतील नागरिकांचे प्रश्न प्रत्यक्ष ऐकून घेणे आणि स्थानिक पातळीवरील समस्यांची नोंद घेणे हा या उपक्रमाचा उद्देश असल्याचे काँग्रेसने सांगितले.

यात्रेच्या उर्वरित दिवसांतही विविध भागांत पदयात्रा, जनसंवाद आणि सांस्कृतिक कार्यक्रम आयोजित करण्यात येणार असून, गोव्याच्या भवितव्याशी संबंधित चर्चेत जनतेचा सहभाग अधिक व्यापक करण्याचा प्रयत्न केला जाणार आहे.

गोंय राखण यात्रा ज्या-ज्या भागातून पुढे जाईल, त्या त्या ठिकाणी गोमंतकीयांनी मोठ्या संख्येने सहभागी व्हावे, आपल्या समस्या, अनुभव आणि सूचना काँग्रेससमोर मांडाव्यात, असे आवाहन काँग्रेसने केले आहे.