शेती यांत्रिकीकरणाला चालना; ट्रॅक्टर भाडे दरवाढीस मुख्यमंत्री डॉ. प्रमोद सावंत यांची मंजुरी

गोवा खबर: मुख्यमंत्री डॉ. प्रमोद सावंत यांनी कृषी क्षेत्रातील कस्टम हायरिंग सर्व्हिसेससाठी सुधारित योजनेअंतर्गत ट्रॅक्टर भाडे दरांमध्ये वाढ करण्यास मंजुरी दिली आहे. या निर्णयामुळे राज्यातील शेतकऱ्यांना कृषी यांत्रिकीकरणाचा अधिक लाभ मिळणार असून, शेतीसाठी आवश्यक यंत्रसामग्रीची उपलब्धता अधिक सुलभ होण्यास मदत होणार आहे.

सुधारित दरांनुसार, ३० एचपी किंवा त्यापेक्षा अधिक क्षमतेच्या ट्रॅक्टरसह (रोटाव्हेटर वगळून) अवजारांसाठी तासिकेचे भाडे ₹८०० वरून ₹१,००० करण्यात आले आहे.

तसेच, ३० एचपी किंवा त्यापेक्षा अधिक क्षमतेच्या ट्रॅक्टरसह रोटाव्हेटरसाठी तासिकेचे भाडे ₹१,००० वरून ₹१,२०० करण्यात आले आहे.

या निर्णयाद्वारे गोवा सरकारने कृषी क्षेत्राला अधिक बळकटी देण्याबरोबरच शेतकऱ्यांना आधुनिक यांत्रिकीकरणाचा लाभ सहज उपलब्ध करून देण्याच्या आपल्या वचनबद्धतेचा पुनरुच्चार केला आहे.