भारतीय रेड क्रॉस सोसायटी, गोवा राज्य शाखेतर्फे आमली पदार्थांविरोधात जनजागृती कार्यक्रम

गोवा खबर:आंतरराष्ट्रीय अमली पदार्थ दुरुपयोग व अवैध तस्करी विरोधी दिन निमित्त भारतीय रेड क्रॉस सोसायटी, गोवा राज्य शाखेतर्फे पणजी येथील राज्य मुख्यालयात विशेष व्याख्यान व जनजागृती कार्यक्रम आयोजित करण्यात आला.

कार्यक्रमाच्या प्रारंभी भारतीय रेड क्रॉस सोसायटी, गोवा राज्य शाखेचे अध्यक्ष श्री गौरिश धोंड यांनी स्वागतपर भाषण करताना तरुण पिढीमध्ये अमली पदार्थांच्या दुष्परिणामांविषयी जागृती निर्माण करण्याचे महत्त्व अधोरेखित केले. अमली पदार्थांच्या वाढत्या विळख्याचा सामना करण्यासाठी समाजातील प्रत्येक घटकाने सामूहिक जबाबदारी स्वीकारण्याचे आवाहन त्यांनी केले.

कार्यक्रमाचे प्रमुख वक्ते डॉ. सिल्वानो डायस सापेको, माजी विभागप्रमुख, न्यायवैद्यक (फॉरेन्सिक मेडिसिन), गोवा वैद्यकीय महाविद्यालय व रुग्णालय, यांनी आपल्या प्रदीर्घ अनुभवाच्या आधारे अमली पदार्थांचे व्यसन, त्याचे व्यक्ती, कुटुंब व समाजावर होणारे घातक परिणाम, व्यसनाचे वैद्यकीय व न्यायवैद्यकीय पैलू तसेच प्रतिबंधात्मक शिक्षणाची गरज यावर सविस्तर मार्गदर्शन केले. त्यांच्या प्रभावी व्याख्यानानंतर झालेल्या संवादात्मक सत्रात विद्यार्थ्यांनी उत्स्फूर्तपणे प्रश्न विचारून चर्चेत सहभाग घेतला.

आभार प्रदर्शन करताना श्री मांगिरीश पै रायकर यांनी विद्यार्थ्यांना अमली पदार्थांविरोधातील लढ्यात जनजागृतीचे दूत बनण्याचे आवाहन केले. आपल्या मित्रपरिवार, कुटुंब आणि समाजामध्ये जागरूकता निर्माण करून निरोगी व व्यसनमुक्त जीवनशैलीचा संदेश देण्याचे त्यांनी सांगितले.

या कार्यक्रमाला भारतीय रेड क्रॉस सोसायटी, गोवा राज्य शाखेचे सरचिटणीस श्री जॉन आगियार उपस्थित होते. कार्यक्रमाचे सूत्रसंचालन ॲड. हर्षा नाईक यांनी केले.

या कार्यक्रमास परिसरातील विविध शाळांमधील युथ रेड क्रॉस व ज्युनिअर रेड क्रॉसचे विद्यार्थी तसेच त्यांचे शिक्षक-समुपदेशक मोठ्या संख्येने उपस्थित होते. उपस्थितांनी कार्यक्रमाची माहितीपूर्ण व संवादात्मक मांडणीचे कौतुक केले.

भारतीय रेड क्रॉस सोसायटी, गोवा राज्य शाखेने समाजात जनजागृती आणि प्रतिबंधात्मक शिक्षणाद्वारे निरोगी, सुरक्षित व व्यसनमुक्त समाज घडविण्याच्या आपल्या वचनबद्धतेचा यावेळी पुनरुच्चार केला.