युतीची चर्चा व्यासपीठावर नव्हे, समोरासमोर व्हावी : चोडणकर

गोवा खबर : युतीसारख्या महत्त्वाच्या विषयांवर राजकीय पक्षांनी सार्वजनिक व्यासपीठावरून जाहीरपणे चर्चा करणे योग्य नसून, संबंधित पक्षांनी एकत्र बसून समोरासमोर अशी चर्चा करायला हवी, असे मत प्रदेश काँग्रेस अध्यक्ष गिरीश चोडणकर यांनी व्यक्त केले आहे. गोवा फॉरवर्ड पक्षाचे अध्यक्ष विजय सरदेसाई यांनी युतीबाबत केलेल्या विधानाची आपल्याला कोणतीही माहिती नसल्याचे सांगत चोडणकर यांनी त्याविषयी अधिक भाष्य करण्याचे टाळले.

चोडणकर यांनी पुढे स्पष्ट केले की, गोवा फॉरवर्ड पक्षासोबतच्या संभाव्य युतीचा अधिकृत प्रस्ताव सध्या पक्षश्रेष्ठींसमोर ठेवण्यात आला असून, त्यावर दिल्लीत सविस्तर चर्चा करूनच अंतिम निर्णय घेतला जाईल. “काँग्रेस स्वतःचे सरकार स्थापन करण्याच्या तयारीत नाही” किंवा “आधीच सर्व काही ठरलेले आहे” अशा राजकीय विधानांविषयी देखील आपल्याला काहीही माहिती नसल्याचे त्यांनी यावेळी सांगितले.

दरम्यान, काँग्रेस पक्षाने अद्याप आगामी निवडणुकीसाठी कोणाचीही अधिकृत उमेदवारी जाहीर केलेली नाही. निवडणूक लढवण्याची इच्छा व्यक्त करणाऱ्यांना थांबवणे जरी शक्य नसले, तरी पक्षाची अधिकृत उमेदवारी प्रक्रिया अद्याप सुरू झालेली नाही, असेही त्यांनी नमूद केले. पणजी मतदारसंघातून काँग्रेसच्या तिकिटावर निवडणूक लढवण्याची इच्छा माजी महापौर सुरेंद्र फुर्तादो यांनी व्यक्त केली आहे, मात्र निवडणुकीला अद्याप अवधी असल्याने तूर्तास काळजीचे कारण नाही, असे चोडणकर म्हणाले.

दुसरीकडे, गोवा काँग्रेसमध्ये दोन वेगवेगळे गट असल्याच्या चर्चांना त्यांनी पूर्णपणे फेटाळून लावले असून, पक्षात पाटकर किंवा चोडणकर असा कोणताही वाद नाही. पाटकर अजूनही काँग्रेसमध्येच असून ते पक्षासाठी पूर्ण ताकदीने कार्यरत आहेत, त्यामुळे गोव्यात काँग्रेसमध्ये गटबाजीचा प्रश्नच उद्भवत नाही, असा विश्वास त्यांनी व्यक्त केला.