“शाळा आणि रुग्णालयांच्या कामावर आम्हाला हरवू शकत नाहीत, म्हणून भाजपने खोटा खटला रचला.”: अरविंद केजरीवाल

गोवा खबर:आम आदमी पार्टी गोवा युनिटने पणजी येथे आम आदमी पार्टीचे राष्ट्रीय संयोजक अरविंद केजरीवाल यांचा खोट्या दारू धोरण प्रकरणातून निर्दोष सुटल्यानंतर भव्य सत्कार सोहळा आयोजित केला. या कार्यक्रमाला राज्यभरातून पक्षाचे नेते, कार्यकर्ते आणि समर्थक मोठ्या संख्येने उपस्थित होते. पक्षाच्या मते, हा सत्याचा राजकीय कटावर मिळालेला ऐतिहासिक विजय आहे. यावेळी सीसीपी निवडणुकीत विजय मिळवणारे आपचे पहिले नगरसेवक जॅक सुखिजा तसेच जिल्हा पंचायत निवडणुकीत विजयी झालेले अँटोनियो लिआओ फर्नांडिस यांचाही सत्कार करण्यात आला.

सभेला संबोधित करताना अरविंद केजरीवाल यांनी पक्ष कार्यकर्ते आणि जनतेचे आभार मानले आणि हा संपूर्ण प्रसंग आपसाठी “अग्निपरीक्षा” असल्याचे सांगितले. त्यांनी सांगितले की १०० कोटी रुपयांच्या भ्रष्टाचाराचे आरोप करण्यात आले, मात्र कोणताही पुरावा सापडला नाही आणि ६०० पानी न्यायालयीन आदेशातही खटला चालवण्यासाठी पुरेसा आधार नसल्याचे स्पष्ट करण्यात आले. त्यांनी नमूद केले की मनिष सिसोदिया यांच्यासह अनेक वरिष्ठ नेत्यांना महिनोनमहिने तुरुंगात ठेवण्यात आले, तरीही कोणीही दोषी आढळले नाही.

केजरीवाल यांनी आरोप केला की आपचा वाढता प्रभाव थांबवण्यासाठी भाजप नेतृत्वाने हा मोठा राजकीय कट रचला. सत्ता, पैसा आणि केंद्रीय यंत्रणा असूनही भाजप आपला राजकीय पराभव करू शकला नाही, म्हणून बदनामी आणि अटकांचा मार्ग अवलंबला. त्यांनी सांगितले की दिल्ली आणि पंजाबमधील शिक्षण, आरोग्य, मोफत वीज, मोहल्ला क्लिनिक यांसारख्या कामांमुळे आपची राजकारणाची नवी दिशा भाजपसाठी आव्हान ठरली आणि त्यामुळे पक्षाला दडपण्याचा प्रयत्न झाला.

गोव्याच्या संदर्भात बोलताना केजरीवाल यांनी फ़ोंड्यातिल परिस्थितीवर प्रकाश टाकला. त्यांनी सांगितले की फ़ोंड्यात कचऱ्याचे ढीग, कुर्टी भागात अस्वच्छ सांडपाणी, तुंबलेली गटारे आणि खराब पायाभूत सुविधा हे गंभीर प्रश्न आहेत. या मूलभूत समस्यांकडे लक्ष देण्यात भाजप सरकार अपयशी ठरले असून, जनतेच्या प्रश्नांऐवजी राजकीय विरोधकांना लक्ष्य करण्यावर भर दिला जात आहे, अशी टीका त्यांनी केली. “जर त्यांना वाटत असेल की ते मला राजकारणातून संपवू शकतात, तर त्यासाठी त्यांना मला मारावे लागेल किंवा माझ्यापेक्षा अधिक प्रामाणिक काम करून दाखवावे लागेल— कारण मी जिवंत असेपर्यंत प्रामाणिक राजकारणासाठी आणि जनतेसाठी लढत राहणार आहे,” असे ते म्हणाले.

आप गोवा प्रभारी आतिशी यांनी सांगितले की या निर्णयामुळे संपूर्ण गोव्यात आनंदाचे वातावरण आहे आणि आपच्या नेतृत्वाची प्रामाणिकता सिद्ध झाली आहे. गोवा निवडणुकीला कथित मद्य घोटाळ्याशी जोडणारे आरोप पूर्णपणे निराधार असल्याचे त्यांनी स्पष्ट केले. पक्षाच्या कार्यकर्त्यांना नेहमीच विश्वास होता की आपने कधीही जनतेचा पैसा गैरवापर केला नाही. त्यांनी असेही नमूद केले की एकीकडे आपच्या नेत्यांवर खोटे खटले लादले गेले, तर दुसरीकडे अनेक भाजप नेत्यांची संपत्ती मोठ्या प्रमाणात वाढली आहे, ज्यामुळे भ्रष्टाचाराबाबत गंभीर प्रश्न निर्माण होतात.

आप गोवा प्रदेशाध्यक्ष वाल्मीकी नाईक यांनी या निर्णयाला “सत्तेच्या लालसेसमोर प्रामाणिक राजकारणाचा विजय” असे संबोधले. त्यांनी सांगितले की अरविंद केजरीवाल यांचा प्रवास—एक प्रतिष्ठित आयआरएस पद सोडून भ्रष्टाचारविरोधी आंदोलन उभारणे आणि सुशासन देणे—त्यांच्या प्रामाणिकतेचेप्रमाण आहे. गोव्याला या प्रकरणाशी जोडण्याचा प्रयत्न हा आपची बदनामी करण्यासाठी होता, मात्र न्यायालयाच्या निर्णयाने हा कट उघड झाला आहे.

आप आमदार क्रूझ सिल्वा यांनी सांगितले की सत्याला उशीर होऊ शकतो, पण ते कधीही दडपले जाऊ शकत नाही. हा निकाल भाजपच्या प्रचाराला जोरदार उत्तर असून, स्वच्छ आणि जबाबदार प्रशासनासाठी आपच्या विचारसरणीभोवती लोकांनी एकत्र यावे, असे त्यांनी आवाहन केले.

आप आमदार व्हेंझी व्हिएगस यांनी सांगितले की आप म्हणजे आशेचे, प्रामाणिकतेचे आणि कामाच्या राजकारणाचे प्रतीक आहे. भाजपने आपची प्रतिमा खराब करण्याचा प्रयत्न केला आणि सत्तेच्या आमिषाने नेत्यांना फोडण्याचाही प्रयत्न केला, तरी पक्ष एकजूट राहिला. त्यांनी पुढे सांगितले की आप भ्रष्टाचार उघड करत राहील आणि आरोग्य, शिक्षण व पायाभूत सुविधांवर आधारित पर्यायी विकास मॉडेल सादर करेल. त्यांनी नमूद केले की ज्या राज्यांमध्ये आप सरकार आहे, तेथे कामे झाली आहेत, मात्र गोव्यात भाजपच्या राजवटीत रस्ते, स्वच्छता आणि मूलभूत सुविधांचा अभाव कायम आहे.

आम आदमी पार्टी गोवा युनिटने पुन्हा एकदा स्पष्ट केले की या निर्णयामुळे प्रामाणिक राजकारणासाठीचा त्यांचा लढा अधिक बळकट झाला आहे आणि आगामी निवडणुकांमध्ये गोव्यात भाजपला पर्याय म्हणून आप मजबूतपणे उभी राहील, असा विश्वास व्यक्त केला.