गोवा खबर : गोव्याला आयटीबी बर्लिन २०२५ मध्ये दोन प्रतिष्ठित पटवा आंतरराष्ट्रीय प्रवास पुरस्काराने सन्मानित करण्यात आले आहे. हे जगातील सर्वात मोठ्या ट्रॅव्हल ट्रेड मेळाव्यापैकी एक असल्याने भारताचे प्रमुख पर्यटन स्थळ म्हणून गोव्याच्या स्थानाची पुष्टी देत आहे.
गोव्याच्या पर्यटन क्षेत्राच्या प्रगतीसाठी त्यांचे लाभलेले उत्कृष्ट नेतृत्व आणि प्रशासनासाठी, पर्यटन मंत्री रोहन खंवटे यांना ‘टुरिझम मिनिस्टर ऑफ द इयर – इंडिया’ हा पुरस्कार प्रदान करण्यात आला आहे.
गोवा राज्याच्या वैविध्यपूर्ण पर्यटन सेवा, शाश्वत उपक्रम आणि जागतिक आवड ओळखून ‘डेस्टिनेशन ऑफ द इयर – इंडिया’ या पुरस्काराने गोव्याला सन्मानित करण्यात आले आहे.
आयटीबी बर्लिन येथे आयोजित समारंभात गोवा सरकारचे पर्यटन संचालक, केदार नाईक यांनी हे पुरस्कार स्वीकारले. याविषयी कृतज्ञता व्यक्त करताना मंत्री रोहन खंवटे म्हणाले, जागतिक व्यासपीठावर मिळालेली ही ओळख जबाबदार आणि नाविन्यपूर्ण पर्यटनासाठीच्या आमच्या वचनबद्धतेचा पुरावा आहे. गोवा एक जागतिक दर्जाचे गंतव्यस्थान म्हणून विकसित होत आहे. त्याचबरोबर गोवा राज्य आपला समृद्ध वारसा आणि नैसर्गिक सौंदर्याचे जतन करून शाश्वत व उच्च-मूल्य पर्यटन अनुभव सेवा देत आहे.
या पुरस्कारांमुळे गोव्याचे आंतरराष्ट्रीय स्तरावरील स्थान अधिक बळकट झाले आहे. तसेच जागतिक प्रवाश्यांच्या पसंतीचे पर्यटन स्थळ म्हणून गोव्याप्रतीचे आकर्षण अधिकच वाढले आहे.
