गोवा खबर : भारतीय आंतरराष्ट्रीय चित्रपट महोत्सव (इफफी) भारतीय चित्रपट उद्देगाच्या उदरगतींत म्हत्वाचो मार्गदर्शक वाटचिरो जाला. भारतांत सामुग्री निर्मात्यांची अर्थवेवस्था विकसीत करपाचेर लक्ष केंद्रीत केलां, जी नेटान वाडत आसा, अशें केंद्रीय म्हायती आनी प्रसारण मंत्री अश्विनी वैष्णव हांणी 55व्या इफ्फीच्या उक्तावण सुवाळ्या वेळार व्हिडियो संदेशांत सांगलें.
अर्थीक वाड करपाक योगदान दिवपी आनी देशाचें गिरेस्त सांस्कृतीक दायज दाखोवपी एक गतीशील शक्त म्हूण भारताच्या सृजनशील क्षेत्राचेरय मंत्र्यांनी भर दिलो. “देशांत निर्मात्यांक सशक्त करपाक, नवनिर्माणाक पोसवण दिवपाक आनी संवसारीक मळार सांस्कृतीक मुत्सद्देगिरीक चालना दिवप चालू आशिल्ल्यान लोक भारताची विविधांगी संस्कृताय, खाणां-जेवण, गिरेस्त दायज, आनी भारतीय साहित्य आनी भासांची रत्नां मनोरंजक आनी सृजनशील रितीन दाखोवपी अभिनव सामुग्री हाडपाक लागल्यात,” अशे ताणी म्हळे.
तशेंच भारताची खाशेली अस्मिताय प्रतिबिंबीत करतना संवसारीक प्रेक्षकां कडेन प्रतिध्वनीत अशीं कथा तयार करपा खातीर अत्याधुनीक तंत्रगिन्यानाचो लाव घेवंचो उलो केंद्रीय मंत्री अश्विनी वैष्णव हांणी मारला. तंत्रगिन्यानाचें एकीकरण आनी घटमूट निर्मात्यांची यंत्रणा विकसीत जाल्ल्यान भारताचें सृजनशील क्षेत्र फुडेंय फुलतलें अशें आमी मानतात अशें तांणी सांगलें.
सगळ्या चित्रपट मोगींक, चित्रपट निर्मात्यांक, आनी आयएफएफआय प्रतिनिधींक उमेदीन आमंत्रण दिलें, ह्या महोत्सवांतल्यान सृजनशील मनशां खातीर नव्या भागीदारी आनी सहकार्याक पोसवण मेळटली अशी आस्त उक्तायली. “तरणाट्या निर्मात्यांक हांगा मार्गदर्शन मेळटलें अशीय आस्त बाळगीता. ह्या कार्यावळी वेळार सगळ्या कडल्यान आयील्ल्या विचारांक फुडल्या वर्सांनी उद्देगाची दिका तयार करपाक मदत जातली अशें तांणी सांगलें.
भारताची सृजनशील अर्थवेवस्था: एक जागतीक शक्तीघर
आयज उजवाडाक आयिल्ल्या एका लेखांत वैष्णव हांणी भारताच्या सृजनशील अर्थवेवस्थेच्या वाडीच्या खबरे विशींय विस्तारान सांगलां. ‘भारताची सृजनशील अर्थवेवस्था नेटान वाडत आसा, आतां तिचें मोल ३० अब्ज डॉलर जालां, ती भारताच्या जीडीपींत सुमार 2.5% योगदान दिता आनी 8% कामगारांक उदरनिर्वाह दिता. फकत इन्फ्लुएंसर मार्केटिंग क्षेत्राचें मोल 3,375 कोटी रुपया आसा, भारताच्या जागतीक उपस्थितींत 2 लाखां वयर पूर्णवेळ निर्माते योगदान दितात,’ अशें तांणी बरयलां. गुवाहाटी, कोच्ची, इंदौर सारकिलीं शारां सृजनशील केंद्रां म्हणून उदयाक येतात आनी देशभरांत विकेंद्रीत सृजनशील क्रांती घडोवन हाडटात अशें मंत्री हांणी नदरेक हाडलें.
भारताच्या सृजनशील उद्देगांच्या व्यापक परिणामाचेर अश्विनी वैष्णव हांणी भर दिलो आनी ते जीडीपी वाडपा परस चड पातळ्ळ्यात अशे सांगले. बॉलिवूड, प्रादेशिक सिनेमा आनी हेर सांस्कृतीक उत्पादनां वरवीं देशाच्या जागतीक शक्तीक आकार दिवपाक मदत करतात अशें सांगलें.
सरकाराच्या परिवर्तनकारी हस्तक्षेपा विशीं अश्विनी वैष्णव हांणी परतून सांगलें आनी संवसारीक ऑडियो व्हिज्युअल आनी मनरिजवण शिखर परिशद (व्हेवज) देशाक निर्मिती आनी नवनिर्माणांत जागतीक शक्ती केंद्र म्हणून स्थापन करपाचो एक म्हत्वाचो उपक्रम आसा अशें सांगलें. ‘फुडार नवनिर्माण करपी, सहकार्य करपी आनी निर्मिती करपी लोकांचो’ अशें तांणी बरयलां. ‘भारताची सृजनशील अर्थवेवस्था प्रेरणा, अर्थीक वाड, सांस्कृतीक मुत्सद्देगिरी, आनी जागतीक फुडारपणाक चालना दिवची. दरेक भारतीय निर्मातो जागतीक कथाकार जावचो, आनी फाल्यां आकार दिवपी कथां खातीर संवसार भारता कडेन पळयता हाची खात्री करून घेवया.’
इफ्फी सुरू जातना मंत्रालयान आपल्या लेखांतल्यान जागतीक सृजनशील अर्थवेवस्थेचें फुडारपण करपाक भारताच्या निर्मात्यां भुमिका भर दिलो. ‘भारताचे निर्माते जागतीक सृजनशील अर्थवेवस्थेंत फुडाकार घेवपाक तयार आसात अशें तांणी सांगलें.
आयज 20 नोव्हेंबर 2024 ह्या दिसा इफ्फीच्या कायम स्थळ गोंयांत भव्य उक्तावण सुवाळ्यान ह्या महोत्सवाच्या 55व्या आवृत्तीची सुरवात जाली. 9 दिसांचो हो महोत्सव 28 नोव्हेंबर 2024 मेरेन चलतलो आनी फिल्म निर्मात्यांक आनी सृजनशील कलाकारांक एक माची मेळटली.
