फिल्म बाजाराची 18वी आवृत्ती गोंयांतल्या इफ्फीत सुरू

गोवा खबर : भारताच्या 55व्या आंतरराष्ट्रीय चित्रपट महोत्सवात आयज दक्षिण आशियांतल्या प्रिमियर फिल्म बाजारांतल्या फिल्म बाजाराच्या 18 व्या आवृत्तीक सुरवात जाली. आयएफएफआयचो एक म्हत्वाचो विभाग, फिल्म बाजार आकांक्षी फिल्म निर्मात्यांक आनी स्थापन जाल्ल्या उद्देग वेवसायिकां खातीर सिनेमाच्या फुडाराक जोडपाक, सहकार्य करपाक आनी फुडें व्हरपाक एक गतीशील मंच दिवपाचें उतर दिता.

म्हायती आनी प्रसारण मंत्रालयाचे सचीव संजय जाजू हांणी आयएफएफआयंत फिल्म बाजाराचे  उक्तावण करतना विक्रमी नोंदणीं आंकडो (1500 परस चड) आनी देश विशिश्ट 10 परस चड मंडपांचो हजेरीचेर भर दिलो. “फुडल्या फिल्म निर्मात्यांक उर्बा  उमेद  दिवपाक हो एक अपवादात्मक मंच. कल्पना सादर करपा सावन डील सुरक्षीत करप मेरेन फिल्म बाजार उद्देगाच्या सगळ्या पांवड्यार उत्पादक संवादांक पोसवण दिता,” अशें तांणी सांगले.

तरणाट्या प्रतिभेक उर्बा  दिवपा खातीर इफ्फीच्या वचनबद्धते विशीं तांणी आनीक विस्तारान सांगलें. “ह्या वर्साची  क्रिएटिव्ह माइंड्स ऑफ टुमॉरो (सीएमओटी) कार्यावळ, भारताच्या सिनेमा निर्मितीच्या सगळ्यांत बऱ्या  तरणाट्या प्रतिभेचो सोद घेवपाक मुखार आसा, 100 आश्वासक  व्यक्तींक येवकार दिवन म्हत्वाचो विस्तार करपाची नामना बाळगीता ”, अशेंय  तांणी सांगले.

55व्या इफ्फीचे फेस्टिवल डायरेक्टर शेखर कपूर हांणी फिल्म बाजार ही  एक मनोरंजक माची  अशें वर्णन केलें, जंय तरणाटे फिल्म निर्माते आपले विचार आनी निर्मिती उमेदीन सादर करतात. “उपाट आवडीन आपलें काम दाखोवपी तरणाट्या फिल्म निर्मात्यांच्या उर्जेन फिल्म बाजार भरता. हांव हांगा रावून हे सगळे अणभवतलो ”, अशें नामनेच्या फिल्म निर्मात्यान सांगले.

आय अँड बी मंत्रालयाचे संयुक्त सचीव आनी एनएफडीसीचे एमडी प्रीथुल कुमार हांणी ऑनलायन फिल्म बाजार उपक्रम सुरू करपाची घोशणा केली. तांणी सांगलें, हो अभिनव प्लॅटफॉर्म जागतीक खरेदीदार आनी विक्रेत्यांक जोडपाक, कल्पनांचे  आदान-प्रदान करपाक आनी सिनेमाचो वेवसाय मुखार व्हरपाक आभासी केंद्र म्हणून काम करता.

आय अँड बी मंत्रालयाचे संयुक्त सचीव (फिल्म) वृंदा मनोहर देसाय हांणी सात देशांतले 21 फिचर फिल्म आनी 8 वेब मालिका आशिल्ल्या सह-निर्माण बाजाराची म्हायती दिली. वितरण आनी निधी सोदपी फिल्म निर्मात्यां खातीर एक म्हत्वाचो साधन आशिल्ल्या व्ह्यूइंग रूमाचेर भर दितना तिणें उक्तायलें की ह्या वर्सा 208 चित्रपट पळोवपा खातीर उपलब्ध आसतले, तातूंत फिचर, मिड-लेंथ आनी शॉर्ट फॉर्मेट आसतले.

ह्या काऱ्यक्रमाक जेरोम पॅलार्ड, सल्लागार फिल्म बाजार, आनी भारतांतलो ऑस्ट्रेलियेचो उप उच्चायुक्त निकोलस मॅकॅफ्री हांचो आस्पाव आशिल्ल्या नामनेच्या सोयऱ्यांनी वांटो घेतलो.

फिल्म बाजारा विशीं

भारताच्या प्रतिश्ठीत आंतरराश्ट्रीय चित्रपट महोत्सवाच्या (इफ्फी) वांगडाच दर वर्सा फिल्म बाजार आयोजीत करतात. अंदूं फिल्म बाजार 20 ते 24 नोव्हेंबर 2024 मेरेन, गोंयच्या मॅरियट रिसॉर्टांत जातलो.

2007 वर्सा सुरू जाले उपरांत फिल्म बाजार दक्षिण आशियाई चित्रपट आनी चित्रपट निर्मिती, निर्मिती आनी वितरणांतल्या प्रतिभेचो सोद घेवपाक, आदार दिवपाक आनी दाखोवपाक समर्पीत आसा. तशेंच बाजार दक्षिण आशियाई वाठारांतल्या संवसारीक सिनेमाची विक्री करपाक सुविधा दिता, दक्षिण आशियाई आनी आंतरराष्ट्रीय चित्रपट निर्माते, निर्माते, विक्री एजंट आनी सृजनशील आनी अर्थीक सहकार्य सोदपी महोत्सव आयोजकांक  एकठांय हाडपी केंद्र म्हूण काम करता.