सूर्यकिरण एरोबॅटिक चमुने प्रथमच मेरठच्या आकाशात केले हवाई प्रात्यक्षिक

दोन दिवसांच्या हवाई प्रात्यक्षिकाला एक लाखांहून अधिक नागरिकांची उपस्थिती

गोवा खबर:भारतीय हवाई दलाच्या सूर्यकिरण एरोबॅटिक चमुने (एसकेएटी) 19 आणि 20 सप्टेंबर 2026 रोजी प्रथमच मेरठच्या आकाशात हवाई प्रात्यक्षिक सादर करून प्रेक्षकांना थक्क केले. या नेत्रदीपक प्रात्यक्षिकाचा अनुभव घेण्यासाठी दोन दिवसांत विद्यार्थी, राष्ट्रीय छात्र सेनेचे (एनसीसी) छात्र आणि राष्ट्रीय सेवा योजनेचे (एनएसएस) स्वयंसेवक यांच्यासह एक लाखांहून अधिक नागरिक उपस्थित होते. विशेष म्हणजे, एसकेएटीच्या पथकातील तीन सदस्य, ज्यामध्ये हवाई कसरती सादर करणाऱ्या दोन वैमानिकांचा समावेश आहे, हे मेरठचे रहिवासी आहेत.

20 सप्टेंबर 2026 रोजी संरक्षण राज्यमंत्री संजय सेठ यांनी या हवाई प्रात्यक्षिकाचा अनुभव घेतला. संजय सेठ यांनी एक्सवर पोस्ट करताना या कार्यक्रमाचे वर्णन शिस्त, अचूकता, सांघिक कार्य आणि व्यावसायिकतेचा अद्भुत संगम तसेच भारतीय हवाई दलाच्या गौरवशाली क्षमतांचे प्रतीक, असे केले. गेल्या 30 वर्षांच्या प्रवासात भारतात आणि परदेशात 800 हून अधिक हवाई प्रात्यक्षिके सादर करणाऱ्या एसकेएटीच्या धैर्याचे आणि समर्पणाचे त्यांनी कौतुक केले.

हवाई प्रात्यक्षिकाच्या पहिल्या दिवशी एक्सवर पोस्ट करताना उत्तर प्रदेशचे मुख्यमंत्री योगी आदित्यनाथ यांनी तिरंग्याच्या रंगांनी आकाश रंगवणाऱ्या एसकेएटीच्या वैमानिकांच्या अचूकतेचे आणि धैर्याचे कौतुक केले. हा राज्यासाठी आणि संपूर्ण देशासाठी अभिमानाचा आणि प्रेरणादायी क्षण असल्याचे त्यांनी म्हटले.

या हवाई प्रात्यक्षिकाला उपस्थित राहिलेल्या इतर मान्यवरांमध्ये राज्यसभा खासदार डॉ. लक्ष्मीकांत बाजपेयी, उत्तर प्रदेशचे राज्यमंत्री सोमेंद्र तोमर आणि विधान परिषदेचे सदस्य अश्विनी त्यागी आणि धर्मेंद्र भारद्वाज यांचा समावेश होता.

मेरठ हवाई प्रात्यक्षिकाबाबत

2026 च्या प्रशिक्षण हंगामाची यशस्वी सांगता केल्यानंतर सूर्यकिरण एरोबॅटिक चमुने मेरठच्या नागरिकांसमोर आपली नवीनतम संरचना सादर केली. हिंदुस्तान एरोनॉटिक्स लिमिटेडने (एचएएल) भारतात परवान्याअंतर्गत उत्पादित केलेल्या वैशिष्ट्यपूर्ण लाल आणि पांढऱ्या रंगाच्या नऊ हॉक एमके 132 विमानांद्वारे या पथकाने नेत्रदीपक हवाई कसरती सादर केल्या. या कसरतींनी प्रेक्षकांना मंत्रमुग्ध केले. आकर्षक लूप आणि रोमांचक बॅरल रोलपासून उलटे उड्डाण आणि प्रसिद्ध डीएनए कसरतीपर्यंत प्रत्येक हालचाल अचूकता, कौशल्य आणि सुरळीत समन्वयाचे नेत्रदीपक प्रदर्शन ठरली.

ही विमाने एकमेकांच्या अत्यंत जवळून, पाच मीटरपेक्षा कमी अंतरावरून उड्डाण करतात. त्यामुळे प्रत्येक कसरत ही उत्कृष्ट उड्डाण कौशल्य, शिस्त आणि संरचनेतील सदस्यांमधील दृढ विश्वासाचे प्रतीक ठरते. या प्रात्यक्षिकाला आणखी एक आकर्षक आयाम देताना, हॉक एमके 132 विमानांमध्ये रंगीत धूर निर्माण करण्यास सक्षम स्मोक पॉड्स बसविण्याचा महत्त्वपूर्ण स्वदेशी बदल करण्यात आला आहे. भारतीय हवाई दलाच्या नाशिक येथील बेस रिपेअर डेपोमध्ये भारतात विकसित करण्यात आलेल्या या बदलामुळे विमानांना आकाशात राष्ट्रध्वजाचे भगवे, पांढरे आणि हिरवे रंग साकारता येतात.

सूर्यकिरण एरोबॅटिक टीमबाबत

1996 मध्ये स्थापन झालेल्या सूर्यकिरण एरोबॅटिक चमुला आशियातील एकमेव नऊ विमानांचे एरोबॅटिक पथक असल्याचा मान आहे. तसेच, जगातील अशा निवडक पथकांमध्ये त्याचा समावेश होतो. भारतभर 800 हून अधिक हवाई प्रात्यक्षिकांद्वारे प्रेक्षकांना मंत्रमुग्ध करण्याबरोबरच, चीन, श्रीलंका, म्यानमार, थायलंड, सिंगापूर, संयुक्त अरब अमिराती आणि दुबई येथे आंतरराष्ट्रीय हवाई प्रदर्शनांमध्ये भारतीय हवाई दलाच्या व्यावसायिकतेचे प्रतिनिधित्व करणारे सूर्यकिरण पथक आता केवळ हवाई कसरती करणाऱ्या पथकापेक्षा बरेच पुढे गेले आहे.

भारतीय हवाई दलाचे राजदूत’ म्हणून सूर्यकिरण पथक आपल्या प्रत्येक उड्डाणाद्वारे हवाई दलाची भावना पोहोचवते. उत्कृष्टतेचा समृद्ध वारसा प्रदर्शित करताना, संरक्षण दलांमध्ये करिअर करण्याची आकांक्षा बाळगण्यासाठी युवकांना प्रेरणा देणे आणि भारतीय हवाई दलाची व्यावसायिकता, अचूकता, शिस्त आणि समर्पण यांचा प्रत्यक्ष अनुभव घेण्याची संधी उपलब्ध करून देणे, हे पथकाचे कार्य आहे.