राज्यपालांकडून गोव्यातील शिक्षक बांधवांना शिक्षक दिनाच्या शुभेच्छा

गोवा खबर:गोव्याचे राज्यपाल श्री पुसापती अशोक गजपती राजू यांनी गोव्यातील संपूर्ण शिक्षक बांधवांना शिक्षक दिनाच्या या महत्त्वाच्या प्रसंगी हार्दिक शुभेच्छा व्यक्त केल्या आहेत.

आपल्या संदेशात राज्यपाल म्हणतात, ‘समाजात शिक्षकांचे स्थान अत्यंत महत्त्वाचे असते. ते केवळ ज्ञान देण्याचे काम करीत नाहीत, तर ते विद्यार्थ्यांची मने घडवितात, त्यांचे चारित्र्य जोपासतात आणि त्यांना स्वतःची क्षमता ओळखण्यासाठी व ती विकसित करण्यासाठी प्रेरित करतात. एखाद्या राष्ट्राचे भविष्य अनेक अर्थांनी वर्गांमध्येच घडत असते आणि शिक्षक हे त्या भविष्याचे अत्यंत महत्त्वाचे शिल्पकार असतात.

आपण जलद तांत्रिक प्रगती, माहितीची अभूतपूर्व उपलब्धता आणि सतत बदलणारी सामाजिक व व्यावसायिक आव्हाने असलेल्या युगात जगत आहोत. अशा काळात शिक्षकाची भूमिका अधिकच महत्त्वपूर्ण ठरते. माहिती सहज उपलब्ध असली, तरी शहाणपण, विवेकबुद्धी आणि ‘योग्य’ व ‘केवळ सोयीस्कर’ यांमधील फरक ओळखण्याची क्षमता काळजीपूर्वक जोपासली पाहिजे. केवळ शैक्षणिक उत्कृष्टतेकडेच नव्हे, तर जबाबदार, संवेदनशील आणि सुजाण नागरिक बनण्याच्या दिशेनेही तरुणांना मार्गदर्शन करण्याची महत्त्वाची जबाबदारी आपल्या शिक्षकांवर आहे, असे राज्यपाल म्हणतात.

शिक्षणाने केवळ तरुणांना ज्ञान आणि कौशल्याने सक्षम करणे पुरेसे नाही, तर त्यासोबतच त्यांच्यात मूल्ये, सचोटी, शिस्त आणि इतरांबद्दल आदर यांसारखे गुणही रुजविणे तितकेच आवश्यक आहे. शिक्षकांकडे विद्यार्थ्यांमध्ये जिज्ञासा जागृत करण्याची, आत्मविश्वास निर्माण करण्याची, तसेच त्यांची आवड व प्रेरणा जोपासण्याची आणि त्यांना आपली स्वप्ने पूर्ण करण्यासाठी आवश्यक ती दृष्टी व धैर्य देण्याची एक अनोखी संधी असते. एक उत्तम शिक्षक विद्यार्थ्याला स्वप्न पाहण्यास सक्षम करतो आणि त्याचवेळी, आव्हानांवर मात करून ती स्वप्ने वास्तवात उतरविण्यासाठी लागणारे बळ व दृढनिश्चयही त्याला देतो.

आपल्या तरुणांना भविष्यातील संधी आणि अनिश्चिततेला सामोरे जाण्यासाठी सज्ज करत असताना, मी शिक्षक वर्गाला असे आवाहन करतो की, त्यांनी विद्यार्थ्यांना चिकित्सकपणे विचार करण्यास, जबाबदारीने वागण्यास आणि आपल्या समाजाच्या शाश्वत मूल्यांशी जोडून राहण्यास प्रेरित करणे सुरू ठेवावे. शिक्षकांनी दिलेले मार्गदर्शन आणि आदर्श हे एक अशी पिढी घडविण्यात निर्णायक भूमिका बजावतील, जी सक्षम, लवचिक, नाविन्यपूर्ण आणि मजबूत नैतिक मूल्यांनी प्रेरित असेल.

आजच्या या शिक्षक दिनानिमित्त, राष्ट्र उभारणी प्रक्रियेतील शिक्षकांच्या अमूल्य योगदानाबद्दल आणि समर्पित सेवेबद्दल मी सर्व शिक्षकांचे अभिनंदन करतो. मी संपूर्ण शिक्षक वर्गाला, भविष्य घडविण्याच्या त्यांच्या उदात्त कार्यात सुख, समाधान आणि निरंतर यशासाठी सदिच्छा देतो. सर्व शिक्षकांना शिक्षक दिनाच्या शुभेच्छा असे राज्यपाल आपल्या संदेशात शेवटी म्हणतात.