गोवा खबर : रस्त्यावरील निराधार बांधवांना हक्काचा आश्रय देणाऱ्या आणि त्यांच्या पुनर्वसनासाठी झटणाऱ्या ‘जीवन आनंद संस्था’ यांच्या निधी संकलनासाठी म्हापशात एका विशेष नाटकाचे आयोजन करण्यात आले होते. धारगळ येथील ‘अभिजीत’ या संस्थेने प्रदीप दळवी लिखित ‘मी नथुराम गोडसे बोलतोय’ हे नाटक म्हापसा येथील प्रसिद्ध हनुमान नाट्यगृहात सादर केले. या नाट्यप्रयोगाला गोव्यातील रसिक प्रेक्षकांनी लक्षणीय उपस्थिती लावली होती. प्रेक्षकांकडून मिळालेली उत्स्फूर्त दाद आणि वेळोवेळी पडणाऱ्या टाळ्यांच्या कडकडाटामुळे हा प्रयोग सर्वार्थाने यशस्वी आणि रंजक ठरला.
समाजसेवक डॉक्टर संजय कोरगावकर यांनी पुरस्कृत केलेल्या या नाटकाचे निर्माते संजय धारगळकर होते, तर नाटकाचे कसदार दिग्दर्शन काका प्रभुदेसाई यांनी केले होते. या नाटकात दीपक देवस्थळी, निलेश नाईक, राजू बोंद्रे, अनय तुयेकर, लवू राऊळ, सुदेश प्रभुदेसाई, संजय धारगळकर, सतिश धुमाळ, सिद्धेश धारगळकर आणि प्रकाश मोरगावकर यांनी विविध महत्त्वाच्या भूमिका अत्यंत ताकदीने साकारून आपल्या उत्कृष्ट अभिनयाची चुणूक दाखवली.
नाटकाची तांत्रिक बाजूही अतिशय मजबूत होती, ज्यामुळे नाटकातील प्रसंग अधिक जिवंत वाटले. यात गुरुप्रसाद रंगमंच, कासारपाल यांचे सुंदर नेपथ्य लाभले होते, तर प्रकाशयोजना विकास कांदोळकर यांची होती. ध्वनी नियोजनाची बाजू शिरोडकर साऊंड सर्व्हिसेस (बांदा) यांनी चोख सांभाळली, तर पार्श्वसंगीत निलेश मोहन नाईक यांचे होते. नाटकाला सागर हळदणकर यांची उत्कृष्ट रंगभूषा आणि महेश चुरी यांची योग्य वेशभूषा लाभली होती.
नाटकाच्या सुरुवातीला ‘जीवन आनंद संस्थेचे’ प्रमुख विश्वस्त संदीप परब यांनी उपस्थितांना संस्थेच्या सामाजिक कार्याचा सविस्तर परिचय करून दिला. या प्रसंगी व्यासपीठावर दिग्दर्शक काका प्रभुदेसाई आणि संस्थेचे महेश स्वार उपस्थित होते. नाट्यप्रयोग यशस्वी झाल्यानंतर, नाटकाचे पुरस्कृतकर्ते डॉक्टर संजय कोरगावकर यांना कृतज्ञता म्हणून पुष्पगुच्छ देऊन विशेष सत्कार करण्यात आला. कार्यक्रमाचे नेटके सूत्रसंचालन संस्थेच्या विश्वस्त पूनम बुर्ये यांनी केले, तर हा प्रयोग यशस्वी करण्यासाठी संस्थेच्या सर्वच पदाधिकाऱ्यांनी आणि कार्यकर्त्यांनी परिश्रम घेतले.
