एएसजी आय हॉस्पिटलद्वारे गोव्यात सेवाविस्तार : द्वितीय सुपर स्पेशालिटी आय हॉस्पिटलचे मडगावमध्ये उद्घाटन

गोवा खबर : भारतातील सुपर स्पेशालिटी नेत्र रुग्णालयांच्या प्रमुख साखळ्यांपैकी एक असलेल्या एएसजी आय हॉस्पिटलने गोव्यातील आपल्या दुसऱ्या रुग्णालयाची सुरुवात केली आहे. दक्षिण गोव्यातील मडगाव येथे या अत्याधुनिक ‘सुपर स्पेशालिटी’ नेत्र रुग्णालयाचे भव्य उद्घाटन ८ जून २०२६ रोजी करण्यात आले. या नवीन केंद्रामुळे आता दक्षिण गोव्यातील रुग्णांना त्यांच्या घराजवळच जागतिक दर्जाचे उपचार मिळणे शक्य झाले असून, विशेष उपचारांसाठी राज्याबाहेर जाण्याची गरज दूर झाली आहे.

या रुग्णालयाचे उद्घाटन सार्वजनिक बांधकाम विभाग आणि वैध मापनशास्त्र मंत्री दिगंबर कामत, बाणावलीचे आमदार वेन्झी विएगश, वेळ्ळीचे आमदार क्रूझ सिल्वा आणि फातोर्डाचे आमदार विजय सरदेसाई यांच्या हस्ते करण्यात आले. याप्रसंगी एएसजी आय हॉस्पिटलचे संस्थापक डॉ. अरुण सिंघवी, मुख्य कार्यकारी अधिकारी डॉ. विकास जैन, मुख्य परिचालन अधिकारी डॉ. राघव रवानी यांच्यासह अनेक वरिष्ठ वैद्यकीय तज्ज्ञ उपस्थित होते. २००५ मध्ये स्थापन झालेल्या एएसजी आय हॉस्पिटलचे देशातील ९५ हून अधिक शहरांमध्ये १८० पेक्षा जास्त रुग्णालयांचे नेटवर्क आहे.

गोव्यात एएसजी आय हॉस्पिटलने २०२१ साली करंजाळे येथे आपल्या पहिल्या रुग्णालयाची सुरुवात केली होती. गेल्या पाच वर्षांत या रुग्णालयाने १२ हजार ५५० हून अधिक मोतीबिंदू शस्त्रक्रिया आणि ६ हजार ३२१ रेटिना संबंधित शस्त्रक्रिया यशस्वीपणे पूर्ण केल्या आहेत. आता मडगाव येथील नवीन केंद्रामध्ये मोतीबिंदू, रेटिना, कॉर्निया, काचबिंदू (ग्लुकोमा), बाल-नेत्ररोग उपचार आणि तिरळेपणा यांसारख्या नेत्ररोगाच्या विविध उप-शाखांमध्ये विशेष उपचार सुविधा पुरवल्या जाणार आहेत. या केंद्रामध्ये विट्रिओ-रेटिना तज्ज्ञ डॉ. पवन व्ही. गर्दे, बाल-नेत्ररोग तज्ज्ञ डॉ. मारुष्का आगियार, डॉ. शॉन सॉक्रेटिस डिसिल्वा आणि डॉ. अक्षया नागवेंकर यांसारख्या प्रतिष्ठित आणि अनुभवी तज्ज्ञांचे पथक रुग्णांच्या सेवेसाठी सज्ज आहे.

आर्थिक परिस्थितीचा अडथळा न येता प्रत्येक व्यक्तीला दर्जेदार नेत्रोपचार उपलब्ध व्हावेत, यासाठी या रुग्णालयाचा समावेश दीनदयाळ सामाजिक सुरक्षा योजना (DDSSY), केंद्र सरकारची आरोग्य योजना (CGHS) आणि प्रमुख खासगी विमा कंपन्यांच्या यादीत करण्यात आला आहे. यामुळे रुग्णांना ‘कॅशलेस’ उपचारांची सुविधा मिळणार आहे. गोव्यातील या दुसऱ्या केंद्राच्या उद्घाटनामुळे एएसजी आय हॉस्पिटलची आता संपूर्ण गोव्यात दोन सुपर स्पेशालिटी रुग्णालये आणि सहा व्हिजन सेंटर्स कार्यरत झाली आहेत, ज्या माध्यमातून १२ हून अधिक नेत्रतज्ज्ञांची टीम राज्यभरातील रुग्णांना अविरत सेवा देत आहे.