वैयक्तिक ‘इगो’ बाजूला ठेवून अनुसूचित जमाती समाजाच्या कल्याणासाठी आम्ही एकत्र आलो : तवडकर

गोवा खबर : किरकोळ कारणांवरून आणि राजकीय मतभेदांमुळे निर्माण झालेले सर्व वैयक्तिक अहंकार आणि ‘इगो’ बाजूला ठेवून, आम्ही सर्व नेते केवळ एसटी (अनुसूचित जमाती) चळवळीच्या आणि समाजाच्या हितासाठी पुन्हा एकदा एका व्यासपीठावर एकत्र आलो आहोत, अशी भावना राज्याचे आदिवासी कल्याणमंत्री रमेश तवडकर यांनी व्यक्त केली.

केपे येथे आयोजित ‘प्रेरणा दिन’ कार्यक्रमात ते बोलत होते. वैयक्तिक मतभेदांमुळे समाजाचे मोठे नुकसान होते, म्हणूनच समाजाच्या अपेक्षा पूर्ण करण्यासाठी आम्ही ऐक्याचा मार्ग स्वीकारला असल्याचे त्यांनी सांगितले.

कार्यक्रमानंतर प्रसारमाध्यमांशी संवाद साधताना मंत्री तवडकर यांनी भूतकाळातील आठवणींना उजाळा दिला. माजी मंत्री आणि आमदार गोविंद गावडे यांच्यासोबतच्या संबंधांवर बोलताना ते म्हणाले की, २०११ पर्यंत आम्ही सर्वजण खांद्याला खांदा लावून एसटी समाजाच्या हक्कांसाठी एकत्र संघर्ष करत होतो. मात्र, त्यानंतरच्या काळात काही राजकीय आणि तात्त्विक मतभेद निर्माण झाले, जे कालांतराने वाढत गेले. या अंतर्गत दुराव्यामुळे एसटी चळवळीचे मोठे नुकसान होत आहे याची जाणीव जेव्हा आम्हाला झाली, तेव्हा समाजाच्या हितासाठी एकत्र येण्याचा निर्णय आम्ही घेतला. समाजाने आमच्याकडून ठेवलेल्या अपेक्षांची आम्हाला पूर्ण जाणीव आहे.

मंत्री तवडकर यांनी २०११ मधील ऐतिहासिक ‘उटा’ (युनायटेड ट्रायबल्स असोसिएशन अलायन्स) आंदोलनाच्या थरारक आठवणींनाही उजाळा दिला. ते म्हणाले की, त्या काळातील आंदोलन पूर्णपणे शांततापूर्ण मार्गाने सुरू होते, मात्र मागण्या मान्य झाल्याचे सांगून आंदोलन मागे घेण्याची घोषणा झाल्यानंतर परिस्थिती बदलली. आंदोलन संपवून शांततेत परतणाऱ्या निष्पाप आंदोलकांवर बाळ्ळी येथे एका संतप्त जमावाने अचानक हिंसक हल्ला केला. या अमानुष हल्ल्यात मंगेष गावकर आणि दिलीप वेळीप या दोन तरुण कार्यकर्त्यांना एका हॉलमध्ये कोंडून जिवंत जाळण्यात आले, ही अत्यंत वेदनादायी घटना होती. या हुतात्म्यांचे हे सर्वोच्च बलिदान एसटी समाजाच्या इतिहासातील एक अत्यंत महत्त्वाचा आणि कधीही न विसरता येणारा टप्पा आहे, असे त्यांनी भावूक होऊन सांगितले. वैयक्तिक इगो विसरून भविष्यातही संपूर्ण एसटी समाजाच्या विकासासाठी प्रत्येकाचे योगदान महत्त्वाचे असून, सर्वांनी एकत्रितपणे काम करण्याची गरज त्यांनी व्यक्त केली. या प्रसंगी उपस्थित समाजबांधवांनीही दोन्ही हुतात्म्यांना खरी श्रद्धांजली आज नेत्यांच्या ऐक्यामुळे मिळाली असल्याची प्रतिक्रिया दिली.