गोव्यातील आयआयटी प्रकल्पासाठी फर्मागुडी येथील जागेचा पर्याय; मुख्यमंत्री सावंत यांची माहिती

गोवा खबर : गोव्याच्या बहुप्रतीक्षित आयआयटी (IIT) प्रकल्पासाठी राज्य सरकारने फर्मागुडी येथील जागेचा प्रस्ताव ठेवला आहे. फर्मागुडी येथील आयटीआय (ITI) जवळ असलेली सरकारी जमीन या प्रकल्पासाठी देण्याचे निश्चित करण्यात आले असल्याची माहिती मुख्यमंत्री डॉ. प्रमोद सावंत यांनी दिली.

पत्रकारांशी संवाद साधताना मुख्यमंत्री म्हणाले की, “आम्ही आयआयटी प्रकल्पासाठी फर्मागुडी येथील सरकारी जमिनीचा पर्याय सुचवला आहे. आता आयआयटीची केंद्रीय समिती गोव्यात येऊन या जागेची पाहणी करेल. त्यांच्या भेटीनंतर या जागेवर शिक्कामोर्तब होऊन पुढील प्रक्रिया जलद गतीने सुरू होईल.”

गेल्या अनेक दिवसांपासून आयआयटी प्रकल्पासाठी योग्य जागेचा शोध सुरू होता. फर्मागुडी येथे आधीच शैक्षणिक वातावरण असल्याने आणि सरकारी जमीन उपलब्ध असल्याने या जागेला प्राधान्य देण्यात आले आहे. आता केंद्राच्या तांत्रिक समितीच्या अहवालाकडे सर्वांचे लक्ष लागले आहे.