गोवा खबर : गोव्याचे ग्रामदैवत आणि लक्षावधी भाविकांचे श्रद्धास्थान असलेल्या शिरगाव येथील श्री लईराई देवीच्या वार्षिक जत्रोत्सवाला मंगळवारी भक्तिमय वातावरणात सुरुवात झाली. या निमित्ताने राज्याचे मुख्यमंत्री डॉ. प्रमोद सावंत यांनी सकाळी मंदिरात उपस्थित राहून देवीचे दर्शन घेतले आणि गोमंतकीय जनतेच्या सुख-समृद्धीसाठी साकडे घातले.
गेल्यावर्षीच्या अनुभवातून धडा घेत, यंदा प्रशासनाने हा उत्सव निर्विघ्नपणे पार पाडण्यासाठी चोख व्यवस्था केली आहे. ‘धोंडांच्या’ या पवित्र उत्सवात शिस्त राखण्यासाठी कडक पोलीस बंदोबस्त आणि वाहतुकीचे चोख नियोजन करण्यात आले आहे.
मुख्यमंत्र्यांनी केली शांततेसाठी प्रार्थना
देवीचे दर्शन घेतल्यानंतर प्रसारमाध्यमांशी बोलताना मुख्यमंत्री म्हणाले, “जत्रोत्सवाच्या निमित्ताने देवीच्या कृपेने सर्व गोमंतकीय जनतेला आणि मानवजातीला उत्तम आरोग्य आणि समृद्धी लाभो, अशी प्रार्थना मी केली आहे.” तसेच, भाविकांनी आणि धोंडांनी प्रशासनाला सहकार्य करून उत्सवाचे नियम पाळावेत, असे आवाहनही त्यांनी यावेळी केले.
प्रशासकीय सज्जता आणि ‘अॅक्शन प्लॅन’
यंदा प्रशासनाने विशेष ‘अॅक्शन प्लॅन’ तयार केला आहे:
- सुरळीत दर्शन: भाविकांना रांगेत आणि शिस्तबद्ध पद्धतीने दर्शन घेता यावे यासाठी स्वयंसेवक आणि पोलीस तैनात आहेत.
- वाहतूक नियोजन: परिसरात फेरी नसल्याने रस्ते मोकळे ठेवण्यात आले असून पार्किंगसाठी स्वतंत्र व्यवस्था करण्यात आली आहे.
- प्रमुख उपस्थिती: पोलीस निरीक्षक विजय राणे, उपजिल्हाधिकारी शुभम नाईक आणि त्यांची टीम प्रत्यक्ष मैदानावर उतरून व्यवस्थेवर लक्ष ठेवून आहे.
आमदारांची मांदियाळी
यावेळी डिचोलीचे आमदार डॉ. चंद्रकांत शेट्ये आणि आमदार प्रेमेंद्र शेट यांनीही श्री लईराई देवीचे दर्शन घेतले. मानवी जीवन सुंदर व्हावे आणि प्रत्येकाला सुख-समाधान मिळावे, अशी भावना डॉ. शेट्ये यांनी व्यक्त केली. तर, आमदार प्रेमेंद्र शेट यांनी भाविकांना जत्रोत्सवाच्या शुभेच्छा देत उत्सवाच्या यशस्वी आयोजनाबद्दल समाधान व्यक्त केले.
भक्तांच्या हाकेला धावून येणारी देवी म्हणून लईराईची ख्याती असल्याने, परराज्यातूनही हजारो भाविक शिरगावच्या दिशेने दाखल होत आहेत.
