गोवा खबर : गोवा चेंबर ऑफ कॉमर्स अँड इंडस्ट्री (GCCI) आणि डब्ल्यूपीयू (WPU) गोवा यांच्या संयुक्त विद्यमाने, प्रख्यात शास्त्रज्ञ आणि ‘गोव्याचे सुपुत्र’ प्रा. डॉ. रघुनाथ अनंत माशेलकर यांना ‘गोमंत गौरव सन्मान’ (जीवनगौरव पुरस्कार) जाहीर करण्यात आला आहे.
हा प्रतिष्ठित सोहळा १६ एप्रिल २०२६ रोजी ४ वाजता पणजी येथील कला अकादमीत पार पडणार असून, ‘गोवा २०३७: नॉलेज, इंडस्ट्री अँड सस्टेनेबिलिटी कॉन्क्लेव्ह’चे ते मुख्य आकर्षण असेल. पद्मविभूषण पुरस्काराने सन्मानित आणि ‘वैज्ञानिक व औद्योगिक संशोधन परिषद’ (CSIR) चे माजी महासंचालक डॉ. माशेलकर यांचा हा गौरव, त्यांच्या माशेल या गावापासून सुरू झालेला आणि जागतिक विचारवंत बनण्यापर्यंतचा हा थक्क करणारा प्रवास, तसेच कल्पकतेवर आधारित सर्वसमावेशक विकासाचे त्यांनी जगासमोर उभे केलेले आदर्श कार्य, यासाठी करण्यात येत आहे.
गोवा चेंबर ऑफ कॉमर्स अँड इंडस्ट्री (GCCI), अध्यक्षा प्रतिमा धोंड यांनी सांगितले की, “हा पुरस्कार डॉ. माशेलकर यांच्या जीवनभरातील उत्कृष्टता आणि सेवेचा गौरव करणारा असून गोव्यातील अत्यंत प्रतिष्ठित पुत्रांपैकी एक म्हणून त्यांचे स्थान अधोरेखित करतो. ‘गांधीयन इंजिनिअरिंग: मोअर फ्रॉम लेस फॉर मोअर’ (कमी संसाधनातून जास्तीत जास्त लोकांसाठी जास्त लाभ) या त्यांच्या तत्त्वज्ञानासाठी ओळखल्या जाणाऱ्या माशेलकरांनी नाविन्यपूर्ण संशोधनाला (Innovation) सामाजिक परिवर्तनाची एक शक्ती म्हणून नवी ओळख दिली आहे. त्यांचा हा प्रवास गोव्यातील जनतेला एका गोष्टीची प्रबळ जाणीव करून देतो की, तुमच्या सुरुवातीची ताकद ही तुमच्या कार्याचा प्रभाव किती मोठा असेल हे ठरवू शकते; आणि त्यांचे यश आगामी पिढ्यांसाठी सदैव मार्गदर्शक प्रकाशस्तंभ ठरत राहील.”
वर्ल्ड पीस युनिव्हर्सिटी (WPU) गोव्याचे कार्यकारी अध्यक्ष डॉ. राहुल कराड यांनी नमूद केले की, प्रा. डॉ. रघुनाथ माशेलकर यांचे जीवन गोव्यातील साधेपणा, जिद्द आणि ज्ञानाप्रती असलेला गाढ आदर अशा सर्वोत्तम गुणांचे प्रतिबिंब आहे. त्यांनी पुढे म्हटले की, ‘गोमंत गौरव सन्मान’ प्रदान करून आमच्या संस्था अशा एका दूरदृष्टी असलेल्या व्यक्तिमत्वाचा गौरव करत आहेत ज्यांनी केवळ भारताची संशोधन व्यवस्था (Innovation Ecosystem) घडवली नाही, तर ते आपल्या गोव्यातील मुळांशी आजही घट्ट जोडलेले आहेत.
हा पुरस्कार सोहळा ‘गोवा २०३७’ परिषदेचा एक अविभाज्य भाग आहे. राज्याच्या विकासाला ‘विकसित भारत @२०४७’ या राष्ट्रीय संकल्पनेशी सुसंगत करण्यासाठी तयार करण्यात आलेले हे एक धोरणात्मक व्यासपीठ आहे. डब्ल्यूपीयू (WPU) गोवाचे कुलसचिव डॉ. विजयन करिपल या संदर्भात म्हणाले की, “राष्ट्रीय उद्दिष्टाच्या दहा वर्षे आधी गोव्याला एका विशिष्ट उंचीवर नेण्यासाठी या परिषदेचे नाव विचारपूर्वक निवडण्यात आले आहे; जेणेकरून भविष्यातील आव्हानांचा अंदाज घेऊन क्षमता बांधणीसाठी एक धोरणात्मक पल्ला गाठता येईल. या कार्यक्रमात औद्योगिक वाढ आणि पर्यावरणीय समतोल राखून गोव्याच्या भविष्याची पुनर्रचना करणे, तसेच उद्योग आणि शैक्षणिक क्षेत्रातील समन्वयातून राज्याला जागतिक ज्ञानाचे केंद्र म्हणून प्रस्थापित करणे यांसारख्या अत्यंत महत्त्वाच्या सत्रांचा समावेश आहे.”
या कार्यक्रमामागील संकल्पनेबद्दल बोलताना संजय आमोणकर डायरेक्टर जनरल, गोवा चेंबर ऑफ कॉमर्स अँड इंडस्ट्री, यांनी सांगितले की, ‘गोवा २०३७’ परिषद हे एका एकात्मिक आणि भविष्यासाठी सज्ज असलेल्या राज्याला आकार देण्यासाठी उचललेले एक उत्प्रेरक पाऊल आहे. त्यांनी यावर भर दिला की, विचारवंत आणि उद्योग क्षेत्रातील तज्ज्ञांना एकत्र आणून, आर्थिकदृष्ट्या चैतन्यपूर्ण, शैक्षणिकदृष्ट्या प्रतिष्ठित आणि पर्यावरणाबाबत जबाबदार अशी एक सामायिक दृष्टी निर्माण करणे हे आमचे ध्येय आहे.
या परिषदेत दोन अत्यंत महत्त्वाच्या चर्चासत्रांचे आयोजन केले जाईल: रिइमॅजिनिंग गोवास फ्युचर: बॅलन्सिंग इंडस्ट्री अँड इकॉलॉजी’ आणि ‘गोवा ॲज अ ग्लोबल नॉलेज हब: ब्रिजिंग अकॅडेमिया अँड इंडस्ट्री’. विकास आणि शाश्वतता यांच्यातील उत्तम मेळ साधून, गोव्याला देशासमोर एक आदर्श मॉडेल म्हणून उभे करण्याच्या उद्देशाने या दोन्ही चर्चासत्रांची आखणी करण्यात आली आहे
