गोवा खबर : हडफडे-अर्पोरा येथील ‘बिर्च बाय रोमिओ लेन’ (Birch by Romeo Lane) या नाईट क्लबला लागलेल्या भीषण आगीच्या प्रकरणात मुख्य संशयित असलेल्या लुथ्रा बंधूंना म्हापसा अतिरिक्त सत्र न्यायालयाने मोठा धक्का दिला आहे. न्यायालयाने गौरव आणि सौरभ लुथ्रा यांचा जामीन अर्ज फेटाळून लावत त्यांना कोठडीतच ठेवण्याचे आदेश दिले आहेत.
डिसेंबर २०२५ मध्ये लागलेल्या या आगीत २५ जणांचा दुर्दैवी मृत्यू झाला होता. या प्रकरणी पोलिसांनी सदोष मनुष्यवधाचा गुन्हा दाखल केला आहे. लुथ्रा बंधूंनी घटनेनंतर परदेशात पळून जाण्याचा प्रयत्न केला होता, ज्याचा उल्लेख सरकारी वकिलांनी न्यायालयात केला.
न्यायालयातील युक्तिवाद :
* सरकारी पक्षाचा दावा: संशयितांनी घटनेनंतर तातडीने थायलंडला जाण्याचे तिकीट बुक केले होते, जे त्यांच्या पळून जाण्याच्या हेतूकडे बोट दाखवते. तसेच, क्लबकडे आवश्यक अग्निशमन दाखले आणि पंचायत परवाने नसल्याचेही समोर आले आहे.
* बचाव पक्षाचे म्हणणे: संशयितांचे वकील ॲड. पराग राव यांनी असा युक्तिवाद केला की, ही घटना अपघाती होती आणि त्यावर सदोष मनुष्यवधाचे कलम लावणे चुकीचे आहे. त्यांनी आता या निकाला विरोधात उच्च न्यायालयात जाण्याचे संकेत दिले आहेत.
* पीडितांना दिलासा: मृत व्यक्तींच्या कुटुंबीयांच्या वतीने लढणारे ॲड. विष्णू जोशी यांनी या निर्णयाचे स्वागत केले असून, “हा न्यायाच्या दिशेने टाकलेले एक छोटे पाऊल आहे,” अशी प्रतिक्रिया दिली.
लुथ्रा बंधू सध्या कोलवाळे मध्यवर्ती कारागृहात असून, त्यांच्या पुढील कायदेशीर हालचालींकडे सर्वांचे लक्ष लागले आहे.
