भाडेकरूंची माहिती देण्याचे आदेश

गोवा खबर:दक्षिण गोवा जिल्हा दंडाधिकाऱ्यांनी एका आदेशाद्वारे दक्षिण गोवा भागातील सर्व हॉटेल्स, लॉजिंग आणि बोर्डिंग, खाजगी गेस्ट हाऊस, पेइंग गेस्ट निवास, तात्पुरती निवासी व्यवस्था करणाऱ्या घर मालकांना, धार्मिक संस्थाना आपल्याकडे येणाऱ्या ग्राहकांची ओळख पटविण्यासाठी ग्राहकांकडून मतदार कार्ड, वाहन चालविण्याचा परवाना, स्मार्ट कार्ड, आधार कार्ड, पासपोर्ट यासारख्या ओळखपत्रांची मागणी करावी. ओळख पटविल्याशिवाय ग्राहकांना आपल्या हॉटेलात किंवा घरांत प्रवेश देऊ नये आणि पोलीसांनी तयार केलेल्या पथिक या सॉफ्टवेयरमध्ये ग्राहकांची सविस्तर माहिती नोंद करून ठेवावी.

तसेच भाडेकरूंची माहिती  जवळच्या पोलीस स्टेशवर द्यावी. मालकांनी आपल्या ग्राहकांची आणि भाडेकरूंची माहिती जतन  करून ठेवावी आणि गरज असते तेंव्हा अशी माहिती पोलीस यंत्रणेस उपलब्ध करावी. या आदेशाचे पालन न करणाऱ्यांवर भारतीय दंड संहितेच्या कलम १८८ खाली कारवाई होईल असे आदेशात पुढे म्हटले आहे.

जिल्हा दंडाधिकाऱ्यांनी दक्षिण गोव्यातील सर्व राष्ट्रीयकृत बँकांनी आपल्या एटीयमच्या सरक्षिततेसाठी २४ तास सुरक्षा रक्षकांची नियुक्ती करण्याचे आणि सीसीटीव्ही कॅमेरा बसविण्याचे आदेश दिले आहेत.

हा आदेश ३० ऑक्टोबर २०२४ पासून लागू करण्यात आला असून ६० दिवसांच्या कालावधीसाठी चालू राहील.