जर्मनीचे कुलपती ओलाफ यांचे गोव्यात पारंपरिक स्वागत

गोवा खबर : जर्मनीचे चान्सलर ओलाफ स्कोल्झ यांचे आज गोवा राज्याच्या एक दिवसीय दौर्‍यावर पारंपरिक स्वागत करण्यात आले. बंदर राज्यमंत्री श्रीपाद नाईक यांच्यासह मुख्यमंत्री डॉ. प्रमोद सावंत, संरक्षण राज्यमंत्री संजय सेठ, शिष्टाचारमंत्री माविन गुदिन्हो आणि शिष्टाचार सचिव संजीत रॉड्रिग्स यांनी स्कोल्झ यांचे आयएनएस हंसा, दाबोळी येथे आगमन झाल्यावर त्यांचे स्वागत केले.

डॉ. सावंत यांनी ओलाफ यांना कुणबी शाल व पारंपरिक दिवा प्रदान केला. कुलपतींच्या आगमनावेळी गोव्याचे पारंपरिक लोकगीतही सादर करण्यात आले.

स्कूल्झचा बिट्स पिलानीच्या विद्यार्थ्यांशी संवाद
भारत आणि जर्मनी हे दोन्ही देश हरित आणि शाश्वत विकासासाठी त्यांच्या समान वचनबद्धतेवर सतत काम करीत आहेत. ग्रीन अँड सस्टेनेबल डेव्हलपमेंट पार्टनरशिप पुढे नेल्यानंतर दोन्ही देशांनी ग्रीन अर्बन मोबिलिटी पार्टनरशिपच्या दुसर्‍या टप्प्यावर सहमती दर्शवली आहे. काल नवी दिल्ली येथे ग्रीन हायड्रोजन रोडमॅपचा शुभारंभ केल्यानंतर ओलाफ स्कोल्झ यांनी आज दक्षिण गोव्यातील सांखवाळ येथील बिट्स पिल्लानी येथील विद्यार्थ्यांशी संवाद साधला.

बिट्स पिलानी कॅम्पसमध्ये त्यांचे आगमन झाले तेव्हा बिट्स पिलानीचे कुलगुरू प्रा. व्ही. रामगोपाल राव, बिट्स पिलानीच्या संचालक प्रा. सुमन कुंडू, केके बिर्ला गोवा कॅम्पस आणि प्रो. मीनल कौशिक यांनी पुष्पगुच्छ देऊन कुलपतींचे स्वागत केले.

विद्यार्थ्यांसोबत प्रश्नोत्तर सत्र
त्यांच्या भेटीदरम्यान बिट्स पिल्लानीच्या विद्यार्थ्यांसोबत प्रश्नोत्तर सत्र आयोजित करण्यात आले होते. सध्याच्या आंतरराष्ट्रीय राजकीय समस्या आणि भारत-जर्मनी सहकार्याच्या शक्यतांवर चर्चा केली. भारत आणि जर्मनी यांच्यातील भविष्यातील सहकार्याबाबत विद्यार्थ्यांच्या प्रश्नांना उत्तर देताना कुलपतींनी दोन्ही देशांमधील माहिती आणि अनुभवांची देवाणघेवाण करण्याच्या महत्त्वावर भर दिला.

कुलपती म्हणाले, येत्या काही दिवसांत जर्मनी भारताला ऊर्जा संक्रमणामध्ये मदत करण्याची भूमिका बजावू शकते. हरित आणि शाश्वत ऊर्जेबाबतच्या प्रश्नाला उत्तर देताना ते म्हणाले, भारतातील नागरिकांच्या चांगल्या, आरोग्यदायी आणि स्वच्छ भविष्यासाठी जर्मनी आणि भारत योगदान देतील.

विद्यार्थ्यांसोबतच्या चर्चेदरम्यान तरुणांसाठी प्रभावी प्रतिनिधित्व, सहकार्याद्वारे नाविन्यपूर्ण संधी सक्षम करणे आणि स्टार्ट-अप्ससह शिक्षण आणि कौशल्य प्रशिक्षणाचे महत्त्व यासह अनेक प्रमुख विषयांवर भर देण्यात आला.

बिट्स पिलानीच्या लायब्ररी हॉलमध्ये प्रवेश करण्यापूर्वी स्कोल्झ यांनी बिट्स पिलानीच्या विद्यार्थ्यांनी तयार केलेले चार प्रकल्प पाहिले. प्रकल्प निर्मिती प्रक्रियेत सहभागी असलेल्या विद्यार्थ्यांशीही त्यांनी संवाद साधला.

सोसायटी ऑफ ऑटोमोटिव्ह इंजिनीअर्स, कॅम्पसचा ऑटोमोटिव्ह क्लब, 2013 मध्ये स्थापन झालेल्या सर्वात जुन्या तांत्रिक क्लबपैकी एक आहे. क्लबने बिट्स कॅम्पसमधील फॉर्म्युला स्टुडंट इलेक्ट्रिक व्हेइकलचे चित्रण केले आहे. शार्दुल तोमर, निलय वाणी, कुणाल वरात या विद्यार्थ्यांनी जर्मनीच्या फेडरल रिपब्लिकच्या कुलपतींना या प्रकल्पाची माहिती दिली.

व्योमेश भट्ट, आकाश भोसले, कौस्तुभ साओजी यांनी बिट्स पिल्लानीच्या 2018 साली स्थापन झालेल्या प्रोजेक्ट क्रॅटोसची माहिती दिली. 50+ विद्यार्थ्यांची टीम 6 उपप्रणालींमध्ये विभागली गेली आहे त्यात मेकॅनिकल, कंट्रोल्स, इलेक्ट्रॉनिक्स, ऑटोनॉमस, पॉवर आणि लाइफ दिटेक्शन यांचा समावेश आहे.

विद्यार्थ्यांच्या टीम अजिंक्य देशपांडे, विमर्श शाह, अंश परमेश्वर यांनी 2008 मध्ये स्थापन केलेल्या इलेक्ट्रॉनिक्स आणि रोबोटिक्सवरील त्यांच्या प्रकल्पाविषयी माहिती दिली.

एरोडायनॅमिक्स क्लब हा राष्ट्रीय आणि आंतरराष्ट्रीय दोन्ही स्पर्धांमध्ये भाग घेणार्‍या विमानचालन उत्साही लोकांचा एक गट आहे. सध्या विमानांमध्ये जगात 26 व्या आणि ड्रोनमध्ये राष्ट्रीय स्तरावर तिसरा क्रमांक आहे. आदर्श पै, राघव मोहन कुमार यांनी व्हीटीओएल, नागरी गतिशीलता सोडवणे, ऑर्निथॉप्टर्स, कृषी क्षेत्रात पाळत ठेवण्यास मदत करणे आणि इतर विविध क्षेत्रांसारख्या वास्तविक-जगातील समस्या सोडवण्यासाठी संशोधन प्रकल्पांची कुलपतींना माहिती दिली.