गोवा खबर
काँग्रेसच्या यात्रेला उत्स्फूर्त प्रतिसाद, लोकसभा निवडणुकीत भाजपच्या पराभवाचा पाटकरांना विश्वास
गोवा खबर: धर्म आणि इतर मुद्द्यांवरून लोकांमध्ये फूट पाडण्याचे भाजपचे कृत्य उघड झाल्याने देशातील जनता 2024 च्या लोकसभा निवडणुकीत या भ्रष्ट जुमला पक्षाला घरी पाठवणार, असा विश्वास काँग्रेसचे गोवा अध्यक्ष अमित पाटकर यांनी व्यक्त केला आहे.
रायबंदर सर्कल ते आझाद मैदान-पणजी येथे ‘भारत जोडो यात्रे’च्या गोवा आवृत्तीला मिळालेल्या उदंड प्रतिसादानंतर पाटकर पत्रकारांशी बोलत होते.
दक्षिण गोव्याचे खासदार फ्रान्सिस सार्दिन, विरोधी पक्षनेते युरी आलेमाव, आमदार अॅड. कार्लूस फॅरेरा, आमदार एल्टन डिकोस्ता, अमरनाथ पणजीकर, महिला प्रमुख बीना नाईक रिची भार्गव, जोएल आंद्राद्रे, विवेक डिसिल्वा, केनिशा मिनेझिस, विल्मा फर्नांडिस, अहराज मुल्ला, नितीन पाटकर, रेनाल्डो रुझारियो, महेश नादर, विजय भिके,प्रदिप नाईक, जनार्दन भंडारी, विरेन्द्र शिरोडकर, सावियो डिसील्वा आदी उपस्थित होते.
‘भ्रष्ट जुमला पक्ष, धर्म आणि इतर मुद्द्यावर देशात फूट पाडण्याचा प्रयत्न करत आहे. हे थांबवून संघटित होण्याची गरज आहे. आमचे नेते राहुल गांधी यांनी त्यांच्या यात्रेदरम्यान हे मुद्दे उपस्थित केले आणि लोकांना एकत्र करण्याचा प्रयत्न केला,” असे पाटकर म्हणाले.
गिरीश चोडणकर म्हणाले की, राहुल गांधींची भारत जोडो यात्रा देशाला एकत्र आणण्याच्या उद्देशाने होती कारण सत्ताधारी भाजप धर्म आणि जातीवरून लोकांमध्ये फूट पाडत आहे.
“राज्यात बेरोजगारीचे प्रमाण जास्त असल्याने तरुणांमध्ये निराशा आहे. त्यामुळे अनेकजण आमच्यात सामील झाले आणि मला विश्वास आहे की ही शक्ती भाजपच्या कृत्यांचा पर्दाफाश करेल,” असे ते म्हणाले.
या यात्रेत अनेक तरुण सहभागी झाल्याचे सार्दिन यांनी यावेळी सांगितले. “राहुल गांधींना देशाला एकत्र करायचे आहे कारण सत्ताधारी भाजप लोकांमध्ये फूट पाडत आहे. आम्ही या सरकारचा पर्दाफाश करू इच्छितो आणि लोकांना सांगू इच्छितो की या पक्षाने आमच्या देशाचा कसा नाश केला आहे. इथे बेरोजगारी वाढत असून महागाईवर सुद्धा नियंत्रण नाही. आपण भाजपला घरची वाट दाखवली पाहिजे, असे ते म्हणाले.
गोवा प्रदेश युवक काँग्रेसच्या राज्य प्रभारी रिची भार्गव म्हणाल्या की, आजपासून राज्यातील लोक भाजपने उभारलेल्या द्वेषाच्या बाजारपेठेत प्रेमाची दुकाने उघडत आहेत.
“लोकांना हे समजले आहे की त्यांच्या जीवनाशी संबंधित वास्तविक समस्या केवळ एकतेनेच सोडवल्या जातील, द्वेष किंवा विभाजनातून नाही. काँग्रेस 2024 च्या सार्वत्रिक निवडणुकीत गोव्यातील दोन्ही जागा जिंकेल आणि प्रत्येक प्रकारातील द्वेष नष्ट करेल, ” असे ती म्हणाली.
बीना नाईक म्हणाल्या की, राज्याच्या मुक्तीमध्ये महत्त्वाची भूमिका बजावणाऱ्या डॉ. राम मनोहर लोहिया आणि डॉ. ज्युलियो मिनेझिस यांच्या क्रांतीच्या ठिणगीने लोकांना प्रेरणा मिळाली.
“आज युवक काँग्रेस आणि आमचे नेते लोकांच्या मनात ठिणगी निर्माण करण्यासाठी एकत्र आले आहेत. द्वेषाच्या विरोधात ही एक नवीन ठिणगी आहे,” असे ती म्हणाली.
अमरनाथ पणजीकर म्हणाले की, स्वातंत्र्यसैनिकांनी गोव्याचे रक्षण केले म्हणून आजचा दिवस ऐतिहासिक आहे. “मी लोकांना एकजूट राहण्यासाठी एकत्र येण्याचे आवाहन करतो. आपण आपल्या शांततेचे आणि गोव्याचे रक्षण करणे आवश्यक आहे,” असे ते म्हणाले.
जोएल आंद्राद्रे म्हणाले की, भारताला एकत्र आणून एकात्मता मजबूत करण्याचा विचार आहे. “आम्ही सामाजिक, राजकीय आणि आर्थिक समस्यांना तोंड देत आहोत. महागाई सर्वकाळ उच्च आहे आणि आपल्या जमिनीचा मोठ्या प्रमाणावर नाश केला जात आहे. गोव्यात कायदा आणि सुव्यवस्था ढासळत आहे,” असे ते म्हणाले.