गोवा खबर
अपात्रतेच्या याचिकांवर कालबद्ध पद्धतीने निर्णय घेणे हा लोकसभेच्या अध्यक्षांच्या भाषणाचा विषय असायला हवा होता- अमरनाथ पणजीकर
गोवा खबर: गोवा विधानसभेचे सभापती रमेश तवडकर यांनी हे लक्षात घेतले पाहिजे की लोकांच्या जनादेशाचा अनादर करून लोकशाहीची हत्या करणाऱ्या पक्षबदलूंच्या विरूद्ध दाखल केलेल्या अपात्रतेच्या याचिकांवर निर्णय घेण्यात त्यांच्या निष्क्रियतेने भारताच्या लोकशाहीला मागे नेले आहे. त्यांनी लोकसभा अध्यक्षांना “कालबद्ध पद्धतीने अपात्रतेच्या याचिकांवर निर्णय घेणे” या विषयावर त्यांचे मुख्य भाषण देण्यास सांगायला हवे होते, असे काँग्रेस मीडिया सेलचे अध्यक्ष अमरनाथ पणजीकर यांनी म्हटले आहे.
गोवा विधानसभेचे सभापती रमेश तवडकर यांनी गुरुवार 15 जून 2023 रोजी पर्वरी येथे गोवा विधानसभेच्या सभागृहात आयोजित केलेल्या कार्यक्रमावर प्रतिक्रिया व्यक्त करताना अमरनाथ पणजीकर यांनी सदर कार्यक्रमादरम्यान विरोधी पक्षनेत्याचा भाषणाचा समावेश न करण्याच्या सभापतींच्या कृत्याचा निषेध केला.
गोव्यातील विरोधी पक्षाच्या आमदारांवर हा पूर्ण अन्याय आहे. सभापती रमेश तवडकर हे सत्ताधारी भाजप सरकारच्या बाजूने पूर्णपणे पक्षपाती आहेत आणि विरोधक अपात्रतेचा मुद्दा उपस्थित करतील याची भीती असल्यानेच त्यांनी विरोधी पक्षनेत्यांना भाषण करण्यास देण्याचे टाळले. भाजप सरकार विरोधकांचा आवाज दाबत असल्याचे सिद्ध करणारे हे आणखी एक उदाहरण आहे, असा दावा अमरनाथ पणजीकर यांनी केला.
विधानसभा सभागृहात झालेल्या कार्यक्रमात लोकसभा अध्यक्ष ओम बिर्ला यांच्या मुख्य भाषणाचा विषय असलेल्या “विकसीत भारत 2047 आणि निवडून आलेल्या प्रतिनिधींची भूमिका” या विषयाचा संदर्भ देत काँग्रेस मीडिया सेलचे अध्यक्ष म्हणाले की, लोकसभा अध्यक्षांनी पक्षांतर करणाऱ्या आठ आमदारांचा निषेध केला पाहिजे. देवाची फसवणूक करणे आणि लोकांच्या जनादेशाचा अनादर करणे ही त्यांची लोकशाही विरोधी कृती असल्याचे लोकसभा सभापतीनी आठ पक्षबदलूंना सांगावे. पक्षांतर करणे हा निवडून आलेल्या प्रतिनिधींच्या भूमिकेचा भाग नक्कीच नाही असे अमरनाथ पणजीकर म्हणाले.
राष्ट्रीय नेते राहुल गांधी यांना अपात्र ठरवण्यासाठी सुपरफास्ट कारवाई करणारे लोकसभा अध्यक्ष ओम बिर्ला यांच्याकडून आम्हाला फारशा अपेक्षा नसल्या तरी, त्यांनी गोवा विधानसभेचे सभापती रमेश तवडकर यांना आठ आमदारांविरूद्धच्या अपात्रतेच्या याचिकांवर लवकर निर्णय घेण्याचा सल्ला द्यावा, अशी मागणी अमरनाथ पणजीकर यांनी केली.