गोवा खबर:अखिल भारतीय विद्यार्थी परिषदेच्या गोंय विभागान राज्यांतल्या वेगवेगळ्या समाजीक म्हत्वाच्या सुवातींनी भारतीय तिरंगा उबारून स्वातंत्र्याचीं 75 वर्सां मनयलीं. पेडणें ते काणकोण मेरेनच्या सगळ्या तालुक्यांतल्यान एबीव्हीपी गोंयच्या विद्यार्थी कार्यकर्त्यांनी थळाव्या गांवकारांक आनी विद्यार्थी समाजाक एकठांय येवन तिरंगा उबारपाक एकठांय हाडले. तशेंच आमच्या स्वातंत्र्य संघर्शांतल्या अज्ञात जाल्लया वीरांचोय उगडास करून तांच्या शौर्याचीं काणयो लोकांक सांगल्यो.
ध्वज उबारल्या उपरांत सामुहीकपणान राष्ट्रगीत, भारत माता पूजा आनी सांस्कृतीक कार्यावळी सादर केल्यो. आमच्या राज्यांतल्या आनी देशांतल्या लोकां मदीं देशभक्तीची भावना निर्माण करप हो ह्या कार्यावळींचो हेत आसा. अभाविपचे अस्तंत क्षेत्रीय संघटन मंत्री श्री. देवदत्त जोशी हांणी म्हणलें, “आमच्या देशाच्या स्वातंत्र्याचीं 75 वर्सां आमी मनयतात तेन्ना ह्या दिसाचो एक भाग जावपाचो आमकां अभिमान बाळगूंक जाय. हें स्वातंत्र्य आमकां सहजपणान आयलें ना, हें आमच्या शूरांच्या शौर्याचें परिणाम आसा हें आमी लक्षांत दवरपाक जाय.”
विद्यार्थी परिषद उत्तर गोंय एक गांव एक तिरंगा अभियान मुखेल, सुदिप नायक हांणी म्हणलें, “भारताच्या स्वातंत्र्याचो अमृत महोत्सवाक लोकांची उमेद अजापाची आसा. ध्वज उबारुंग लोकांक प्रेरीत करपाक आनी ध्वज संहिता विशीं जागृताय निर्माण करपाक एबीव्हीपीन व्हड वांटो घेतला. देशभरांतल्या आमच्या लोकांचो एकवट पळोवन बरे दिसता.” देशवास्यांक ह्या राष्ट्रीय उत्सवाचो भाग जावपाची भरपूर संद मेळची म्हणून वर्सभर अशे खाशेले कार्यावळी घडोवन हाडपाची येवजण अखिल भारतीय विद्यार्थी परिशदेची आसा.
