गोवा खबर:गोव्यातील लघुपट वाग्रो ( बलिदानाचे ठिकाण) याला प्रतिष्ठित फेस्टीव्हल डी कान्स २०२२ मध्ये शॉर्ट फिल्म कॉर्नर श्रेणीमध्ये अधिकृतपणे स्वीकारण्यात आले आहे. लघुपट फिल्म कॉर्नर जगभरातील उत्कृष्ट आशादायी लघुपटांची निवड करतो.
वाग्रो ही एक जोडप्याची प्रेमकथा आहे जी एका परिस्थितीनं गुंतलेली असून आपण कुठे आहोत आणि कुणाशी संबंधित आहोत हे शोधण्यात व्यस्त आहे. लघुपटची कथा, पटकथा आणि दिग्दर्शक साईनाथ उस्कईकर यांनी केले असून शैक्षणिक पात्रतेनुसार इंजिनिअर आहे. राजेश र. पेडणेकर आणि गायत्री पेडणेकर यांच्या नेतृत्वाखाली दोन वेळा राष्ट्रीय पुरस्कार विजेते डी गोवन स्टुडिओने या लघुपटाची निर्मिती केली आहे. लघुपटाचे साऊंड डिझाईन आणि मिक्सिंग चार वेळा राष्ट्रीय डिझायनर विश्वदीप दीपक चॅटर्जी यांनी केले. केरळमधील दोन वेळा केरळ राज्य पुरस्कार विजेते लिजू प्रभाकर एक कलरिस्ट म्हणून लघुपटाशी संबंधित आहेत. या टीममध्ये सिनेमॅटोग्राफर अमेय सिमेपुरुषकर, एडिटर व्यंकटेश लगजी आणि पार्श्वसंगीत अभिषेक कदम यांचा समावेश आहे. यात सोबिता कुडतरकर, श्रवण फोंडेकर, प्रणव टेंगसे आणि अमोदी सनप यांचा समावेश आहे.
“गोव्यातील लघुपटाची ही उल्लेखनीय कामगिरी गोव्यातील चित्रपटसृष्टीला चालना देईल. हे तरुण आणि प्रतिभावान लघुपट दिग्दर्शक आणि निर्मात्यांना सार्वत्रिक आवाहनासह चांगल्या कथा व्यक्त करण्यास प्रवृत्त करेल, असे दिग्दर्शक साईनाथ उस्कईकर आणि निर्माता राजेश पेडणेकर म्हणाले.
