मिझोरामच्या प्रतिनिधीमंडळाने सहा दिवसांच्या भेटीदरम्यान गोव्याच्या परंपरा, तंत्रज्ञान आणि औद्योगिक सुविधांचा घेतला अनुभव

गोवा खबर: ‘युवा संगम’च्या सातव्या टप्प्यांतर्गत मिझोरामच्या प्रतिनिधीमंडळाच्या गोवा भेटीने शैक्षणिक दौरे, औद्योगिक भेटी आणि सामायिक सांस्कृतिक अनुभवांच्या माध्यमातून दोन्ही राज्यांमधील सांस्कृतिक बंध आणि लोकांमधील संबंध अधिक मजबूत केले आहेत.

शिक्षण मंत्रालयाच्या ‘एक भारत श्रेष्ठ भारत’ उपक्रमांतर्गत, नॅशनल इन्स्टिट्यूट ऑफ टेक्नॉलॉजी (NIT) गोवा द्वारे आयोजित हा कार्यक्रम 10 ते 16 ऑक्टोबर दरम्यान पार पडला. या भेटीदरम्यान, प्रतिनिधिमंडळाने गोव्याच्या परंपरा, धार्मिक वारसा, पर्यटन स्थळे, तसेच तांत्रिक आणि औद्योगिक सुविधांचे जवळून निरीक्षण केले.

दाबोलिम विमानतळावर एनआयटी (NIT) गोवाचे समन्वयक डॉ. अपारूप बिस्वाल आणि डॉ. रवी प्रसाद यांनी विद्यार्थी प्रतिनिधींसह या शिष्टमंडळाचे स्वागत केले. या भेटीची सुरुवात एका अभिमुखता  कार्यक्रमाद्वारे झाली, ज्यामध्ये एनआयटी गोवाचे संचालक आणि ‘युवा संगम’ (फेज 7) चे नोडल अधिकारी डॉ. शिवनारायण पाटीदार यांनी मार्गदर्शन केले.

प्रतिनिधीमंडळाने वास्को द गामा येथील बिर्ला मंदिर आणि नेव्हल एव्हिएशन म्युझियमला भेट दिली. तसेच, संस्थेतील शैक्षणिक सुविधा आणि अभियांत्रिकी अभ्यासक्रमांची माहिती जाणून घेण्यासाठी त्यांनी एनआयटी गोवाच्या विविध शैक्षणिक विभागांनाही भेट दिली.

‘तानशिकर स्पाइस फार्म’च्या भेटीतून त्यांना गोव्याच्या कृषी वारशाबद्दल माहिती मिळाली, तर पद्मश्री पुरस्काराचे मानकरी संजय अनंत पाटील यांच्याशी झालेल्या संवादातून त्यांच्या अनुभवांतून शिकण्याची संधी मिळाली. तसेच , गोव्याच्या धार्मिक आणि वास्तुशिल्प परंपरा जाणून घेण्यासाठी शिष्टमंडळाने मंगेशी मंदिरालाही भेट दिली.

एनआयटी गोवा येथे आयोजित सांस्कृतिक रजनीमध्ये सांस्कृतिक आदान-प्रदान हे प्रमुख आकर्षण ठरले. यामध्ये फुगडी, धालो आणि देखणी यांसारखे गोव्याचे लोककला प्रकार, गोव्याच्या वारशावरील एक लघुनाट्य आणि मिझोरामच्या प्रतिनिधींचे कार्यक्रम सादर करण्यात आले.

औद्योगिक भेटी  आणि राज्यपालांशी संवाद

प्रतिनिधी मंडळाने 13 ऑक्टोबर रोजी बेतुल येथील ओएनजीसी प्रगत प्रशिक्षण संस्थेला भेट दिली. यावेळी सहभागींनी सी सर्व्हायव्हल सेंटरमध्ये बचाव कार्याचे प्रात्यक्षिक पाहिले आणि अग्निशमन प्रशिक्षण, औद्योगिक सुरक्षा तसेच तेल आणि वायू क्षेत्रातील प्रशिक्षण सुविधांविषयी माहिती घेतली. या भेटीनंतर काबो दे रामा व्ह्यूपॉइंट आणि पालोलेम बीच येथे सहलीचे  आयोजन करण्यात आले होते.

लोक भवन येथे गोव्याच्या राज्यपालांशी झालेला संवाद हे या भेटीचे एक प्रमुख वैशिष्ट्य होते. राज्यपालांनी मानवी मूल्ये, परस्परांप्रती आदर आणि राष्ट्रीय एकात्मता मजबूत करण्यासाठी धार्मिक विविधतेची भूमिका अधोरेखित केली आणि विविध धर्म व परंपरांमध्ये सौहार्द  व शांततापूर्ण सहजीवनावर भर दिला.

एनआयटी गोवा येथे 16 ऑक्टोबर रोजी आयोजित समारोप समारंभाने या कार्यक्रमाची सांगता झाली. अखिल भारतीय तंत्रशिक्षण परिषदेच्या (एआयसीटीई) ‘नियामक  ब्युरो’चे संचालक आणि ‘युवा संगम’चे समन्वयक नरेश ग्रोव्हर, तसेच एआयसीटीईचे सहाय्यक संचालक लेफ्टनंट कमांडर अखिल शर्मा हे या समारंभाला प्रमुख पाहुणे म्हणून उपस्थित होते.

समारोप समारंभात, एनआयटी गोवाचे संचालक डॉ. शिवनारायण पाटीदार यांनी उपस्थितांना संबोधित केले. त्यांनी युवकांमध्ये राष्ट्रीय एकात्मता आणि सांस्कृतिक समज वाढवण्यामध्ये या कार्यक्रमाची भूमिका अधोरेखित केली. प्रमुख पाहुण्यांनी युवा आदान-प्रदान, अनुभवात्मक शिक्षण आणि विविध राज्यांदरम्यान दीर्घकाळ टिकणारे संबंध निर्माण करण्याच्या महत्त्वावर भर दिला. यावेळी प्रतिनिधींना सहभागी झाल्याबद्दल प्रमाणपत्रे आणि स्मृतीचिन्हे प्रदान करण्यात आली.

सहा दिवसांच्या या भेटीदरम्यान, मिझोरामच्या प्रतिनिधींना गोव्याचा सांस्कृतिक वारसा, शैक्षणिक संस्था आणि औद्योगिक सुविधा प्रत्यक्ष अनुभवण्याची संधी मिळाली.