प्रवीण झांट्ये पुन्हा मये मतदारसंघातून विधानसभा निवडणुकीच्या रिंगणात उतरणार?

समर्थक आणि कार्यकर्त्यांसोबत गुप्त बैठक; ‘निवडणुकीसाठी सज्ज व्हा’ असा संदेश

गोवा खबर : मये विधानसभा मतदारसंघाचे माजी आमदार प्रवीण झांट्ये हे पुन्हा एकदा सक्रिय राजकारणात उतरण्याच्या तयारीत आहेत. आगामी विधानसभा निवडणुकीच्या पार्श्वभूमीवर त्यांनी समर्थक आणि कार्यकर्त्यांची बैठक घेऊन निवडणुकीच्या तयारीला लागण्याचे संकेत दिले आहेत.

मिळालेल्या माहितीनुसार, गेल्या रविवारी प्रवीण झांट्ये यांनी डिचोली येथे आपल्या समर्थक आणि कार्यकर्त्यांसोबत गुप्त बैठक घेतली. या बैठकीत त्यांनी कार्यकर्त्यांना ‘निवडणुकीसाठी सज्ज व्हा’ असा संदेश दिल्याचे समजते. त्यामुळे मये मतदारसंघातील राजकीय हालचालींना वेग येण्याची शक्यता आहे.

प्रवीण झांट्ये हे अपक्ष किंवा एखाद्या राजकीय पक्षाच्या उमेदवारीवर निवडणूक लढवणार, हे अद्याप स्पष्ट झालेले नाही. मात्र, प्रमुख राजकीय पक्षाची उमेदवारी मिळवण्यासाठी त्यांनी हालचाली सुरू केल्याची माहिती निकटवर्तीयांकडून मिळाली आहे.

२०१७ साली झालेल्या विधानसभा निवडणुकीत प्रवीण झांट्ये यांनी भाजपचे तत्कालीन आमदार स्व. अनंत शेट यांच्याविरोधात भाजपची बंडखोरी करून निवडणूक लढवली होती. त्या निवडणुकीत त्यांनी अनंत शेट यांचा पराभव करून विजय मिळवला होता.

मात्र, २०२२ च्या विधानसभा निवडणुकीत भाजपने झांट्ये यांना उमेदवारी नाकारून प्रेमेंद्र शेट यांना उमेदवारी दिली. त्यामुळे नाराज झालेल्या झांट्ये यांनी मगो पक्षाच्या उमेदवारीवर निवडणूक लढवली. या निवडणुकीत भाजपचे प्रेमेंद्र शेट विजयी झाले. त्यानंतर प्रवीण झांट्ये काही काळ सक्रिय राजकारणापासून दूर राहिले होते.

आता प्रवीण झांट्ये यांनी पुन्हा राजकीय हालचाली सुरू केल्याने मये मतदारसंघातील आगामी विधानसभा निवडणुकीची समीकरणे बदलण्याची शक्यता व्यक्त होत आहे.

प्रवीण झांट्ये कोणत्या पक्षाकडून निवडणूक लढवणार की अपक्ष म्हणून रिंगणात उतरणार, याबाबत अद्याप अधिकृत घोषणा झालेली नाही. मात्र, समर्थकांसोबत झालेल्या बैठकीमुळे त्यांच्या राजकीय पुनरागमनाच्या चर्चांना उधाण आले आहे.