गोवा खबर
दिल्लीला जाण्याबाबत भाजपने कोणताही निर्णय घेतलेला नाही; मुख्यमंत्री प्रमोद सावंत यांचे स्पष्टीकरण
पक्षाने दिलेली कोणतीही जबाबदारी स्वीकारण्यास तयार; मात्र गोव्याची सेवा करत राहण्याची इच्छा असल्याचे मुख्यमंत्र्यांचे वक्तव्य
गोवा खबर : मुख्यमंत्री डॉ. प्रमोद सावंत यांची दिल्लीला बदली होणार असल्याच्या चर्चांवर मुख्यमंत्र्यांनी स्पष्टीकरण दिले आहे. आपल्याला दिल्लीला पाठविण्याबाबत भारतीय जनता पक्षाने कोणताही निर्णय घेतलेला नाही, असे मुख्यमंत्री डॉ. सावंत यांनी स्पष्ट केले.
दिल्लीला जाण्यासंदर्भात मुख्यमंत्र्यांनी यापूर्वी केलेले विधान सोशल मीडियावर व्हायरल झाले होते. त्यानंतर त्यांच्या राजकीय भवितव्याबाबत विविध चर्चा सुरू झाल्या होत्या. या पार्श्वभूमीवर मुख्यमंत्र्यांनी आपल्या विधानाचा अर्थ स्पष्ट केला.
आपण भाजपचा एक कार्यकर्ता म्हणून बोललो होतो. पक्षाने कोणतीही जबाबदारी दिल्यास ती स्वीकारण्याची आपली तयारी आहे, असे मुख्यमंत्री सावंत यांनी सांगितले.
मात्र, आपली गोव्याची सेवा करत राहण्याची इच्छा असल्याचेही त्यांनी स्पष्ट केले.
दिल्लीला जाण्याबाबत पक्षाने कोणताही निर्णय घेतलेला नसल्याचे सांगत मुख्यमंत्र्यांनी आपल्या व्हायरल विधानावरून सुरू झालेल्या चर्चांबाबत भूमिका स्पष्ट केली.