२२ व २३ ऑक्टोबर रोजी ‘गोवा विद्यापीठ वारसा महोत्सव २०२६’ चे आयोजन

गोवा खबर:गोवा विद्यापीठ बिगर-शिक्षकेतर कर्मचारी संघटनेच्या (GUNTEA) वतीने ‘गोवा विद्यापीठ वारसा महोत्सव २०२६’ चे आयोजन दिनांक २२ व २३ ऑक्टोबर २०२६ रोजी गोवा विद्यापीठाच्या सिल्व्हर ज्युबिली सभागृहात करण्यात आले आहे. हा महोत्सव सकाळी ९ ते रात्री ८ वाजेपर्यंत आयोजित करण्यात येणार आहे. या उपक्रमासाठी गोवा सरकारच्या कला व संस्कृती संचालनालय आणि गोवा विद्यापीठाच्या भारतीय ज्ञान प्रणाली केंद्राचे (IKS) सहकार्य लाभले आहे.

‘कारणासाठी खरेदी (Shop for Cause), स्थानिक उत्पादनांचा अभिमान (Vocal for Local) आणि सेवासंकल्प (Seva Sankalp)’ या प्रेरणादायी संकल्पनांवर आधारित हा महोत्सव गोव्याचा समृद्ध सांस्कृतिक वारसा, पारंपरिक कला, स्थानिक खाद्यसंस्कृती, हस्तकला, स्वदेशी ज्ञानपरंपरा आणि पर्यावरणपूरक जीवनशैली यांना प्रोत्साहन देण्याच्या उद्देशाने आयोजित करण्यात येत आहे.

स्थानिक कारागिर, स्वयं-सहायता गट, पारंपारिक व्यावसायिक आणि स्थानिक उद्योजकांना आपल्या उत्पादनांचे, कौशल्यांचे आणि कलागुणांचे प्रदर्शन करण्यासाठी व्यासपीठ उपलब्ध करून देणे, तसेच स्थानिक उत्पादनांच्या वापराला प्रोत्साहन देऊन स्थानिक रोजगार व उपजीविकेच्या संधी बळकट करणे, हा या महोत्सवाचा प्रमुख उद्देश आहे.

महोत्सवाचे उद्घाटन गुरुवार, दिनांक २२ ऑक्टोबर २०२६ रोजी सकाळी १०.३० वाजता होणार आहे. या उद्घाटन समारंभास गोवा सरकारचे माननीय कला व संस्कृती मंत्री श्री. रमेश तवडकर प्रमुख पाहुणे म्हणून उपस्थित राहणार आहेत. यावेळी कला व संस्कृती संचालनालयाचे संचालक, गोवा विद्यापीठाचे कुलगुरू वरिष्ठ प्राध्यापक राजेंद्र गाड, कुलसचिव प्रा. सुंदर एन. धुरी आणि भारतीय ज्ञान प्रणाली केंद्राचे संचालक डॉ. वॉल्टर मिनेझीस, तसेच इतर मान्यवर, प्राध्यापक, कर्मचारी आणि निमंत्रित उपस्थित राहणार आहेत.

या दोन दिवशीय महोत्सवामध्ये गोव्याचे पारंपरिक खाद्यपदार्थ, स्थानिक खाद्य उत्पादने, हस्तकला वस्तू, स्थानिक पातळीवर तयार केलेली उत्पादने, स्वदेशी व पर्यावरणपूरक वस्तू यांचे प्रदर्शन आणि विक्री आयोजित करण्यात येणार आहे. याशिवाय सांस्कृतिक कार्यक्रम आणि विविध स्पर्धांच्या माध्यमातून सर्जनशीलतेला प्रोत्साहन देणे, पारंपरिक कला प्रकारांचे जतन करणे आणि गोव्याच्या मूर्त व अमूर्त सांस्कृतिक वारशाविषयी जनजागृती करणे, यावर भर दिला जाणार आहे.

हा महोत्सव सर्वसामान्य नागरिक, स्थानिक रहिवासी, गोवा विद्यापीठाचे कर्मचारी, विद्यार्थी आणि सर्व संबंधित घटकांसाठी खुला आहे. नागरिकांनी या महोत्सवात मोठ्या संख्येने सहभागी व्हावे, स्थानिक उत्पादनांना प्रोत्साहन द्यावे, सांस्कृतिक कार्यक्रमांचा आनंद घ्यावा आणि गोव्याच्या समृद्ध सांस्कृतिक वारशाच्या जतन व संवर्धनासाठी योगदान द्यावे, असे आवाहन आयोजकांच्या वतीने करण्यात येत आहे.